İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 455 Hüküm no: 561 Orijinal metin no: [236-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Derviş Vakfı’ndan Sarıgüzel’de nalbant dükkânı hissesinin Sadıka bt. Abdullah’a kiraya verilmesi Sarıgez’den na‘alband dükkânını mahlûlden ferâğ Ma‘rûz, Nezâret-i dâ‘îlerinde olan evkāfdan mahmiye-i İstanbul’da Sarıgez kurbünde Sarı Nasuh mahâllesinde vâki‘ Molla Derviş Vakfı’ndan etrâf-ı erba‘ası hamam külhanı ve mismârî dükkânı ve tarîk-i âm ile mahdûd bir bâb na‘alband dükkânının mütevellîsi olan arzuhâl eden Müezzin İbrahim b. Osman meclis-i şer‘-i hatîrde dükkân-ı merkūmun dört hisseden iki hissesi üzerinde iken bundan akdem fevt olan el-Hâc Ali nâm kimesnenin zevcesi ve dükkân-ı merkūma vaz‘-ı yedi mütehakkık olan mu‘arrefetü’z-zât Sadıka bt. Abdullah nâm hatun mahzarında mezbûr el-Hâc Ali’nin üzerinde olan dükkân-ı merkūmun iki hissesi zevcesi mezbûre Hadîce’nin üzerinde iken bi’z-zât kendisi rızâsıyla zevci el-Hâc Ali’ye ferâğ ben dahi izin verip mezbûr el-Hâc Ali’nin üzerinde iken bilâ-veled fevt olup vakfa âid olmağla âhara icâr murâd eylediğimde mezbûre Sadıka mümâna‘at eder deyü iddi‘â ve mezbûre Sadıka dahi vech-i meşrûh üzere ferâğını inkâr ve nizâ‘ etmeleriyle mezbûre Sadıka mu‘accele olmak üzere mütevellî-i mezbûra malından yüz seksen guruş verdikde ol dahi nef‘an li’l-vakf vakıf için ahz u kabz ve hisse-i mezkûreyi mezbûre Sadıka’ya icâr ve kat‘-ı münâza‘a eyledikleri mübâşiri iltimâsıyla huzûr-ı âlîlerine i‘lâm olundu. Fî 13 min-Ş sene [11]79.