İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 455 Hüküm no: 562 Orijinal metin no: [236-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülger Agob’un Hatice Hatun aleyhindeki alacak davasında anlaşma sağlanması Keşf, der-kurb-ı Nişâncıpaşa-i Atik Ma‘rûz Vârid olan fermân-ı âlîlerine imtisâlen arzuhâl eden Şerîfe Hadîce’nin arzuhâlinde iştikâ eylediği Dülger Agob zimmî ile mahâllinde murâfa‘a için kıbel-i şer‘-i şerîfden keşif nâibimiz es-Seyyid Halil Efendi dâ‘îleri irsâl ve ta‘yîn, ol dahi hâssa mi‘mârlarından Hasan ve Mehmed Emin ve sâir ümenâ-yı şer‘le mahmiye-i İstanbul’da Kumkapı kurbünde Nişâncıpaşa-i atik mahâllesinde mezbûre Hadîce’nin binâ etdirdiği menzile varıp akdeylediği meclis-i şer‘-i münîrde merkūm Dülger Agob mu‘arrefetü’z-zât olan mezbûre Şerîfe Hadîce’den bi-şarti’r-rücû‘ emriyle kendi malımdan işbu mu‘âyene olunan büyût-ı adîdeyi hâvî menzilinin beher zirâ‘ı altışar guruş ve üçer rub‘a olmak üzere binâ ve altı yüz yetmiş dokuz guruş sarf etmekle meblağ-ı mezkûrun dört yüz altmış üç buçuk guruşunu mezbûrdan ahz ve bâkī iki yüz on altı guruşu dahi rücû‘ murâd ederim deyü da‘vâ, ol dahi cevâbında müdde‘î-i merkūmun menzil-i mezbûrun bi-şarti’r-rücû‘ emriyle malından binâsına ancak üç yüzelli guruş sarf etmişdir deyü ziyâdesini inkâr ve menzil-i mezkûru keşif esnâsında dahi merkūm bâ-vesâtet-i Müslimîn-i mezbûrûn Hadîce ile ziyâde da‘vâsından altmış guruş bedel-i makbûz mukābelesinde sulh olup menzil-i mezkûrun gerek kereste ve gerek mismâr ve gerek amele ve’l-hâsıl cemî‘ masârıfına müte‘allıka âmme-i da‘vâdan mezbûre Hadîce’nin zimmetini ibrâ ve iskāt ve menzil-i mezkûru fâriğān ani’ş-şevâgil mezbûreye teslîm eyledikde ol dahi tesellüm ve kat‘-ı nizâ‘ eylediklerini mezbûr dâ‘îleri mahâllinde tahrîr ve gelip inhâ etmeğin bi’l-iltimâs huzûr-ı âlîlerine i‘lâm olundu. Fî 13 Receb sene [1]179.