İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 456 Hüküm no: 563 Orijinal metin no: [236-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manuk’un çolak olmasına sebep olduğunu iddia ettiği Karabet aleyhindeki davasından men olunması Zimmînin batşına halel gelip şell olmağla mukaddemâ olan sulhunu isbât Vech-i âtî üzere sol kolu şell olup arzuhâl eden Manuk zimmî meclis-i şer‘-i hatîrde arzuhâlde mezkûr Karabet nâm zimmîden bundan akdem bıçak ile amden işbu sol koluma darb ü cerh ve ba‘de’l-bere batşa halel gelip şell olmağla mûcebini taleb ederim deyü da‘vâ, mezbûr Karabet cevâbında müdde‘î-i merkūm husûs-ı mezkûru bundan akdem benden da‘vâ edip hattâ işbu yetmiş dokuz senesi Recebi’nin yirmi birinci günü Balat’da Haffâflar Çarşısı’nda benimle an-inkâr on beş guruş üzerine sulh olup ve on beş guruşu mahâll-i merkūmda yedimden ahz ve zikr olunan cerha ve mâ-yahdesu minhe müte‘allıka âmme-i da‘vâdan benim zimmetimi ibrâ eyledikde ben dahi ibrâyı kabûl etmiş idim deyü ba‘de’d-def‘ ve’l-inkâr merkūm Karabet def‘-i meşrûhunu udûlden olduğu mahâllinden lede’t-tezkiye ihbâr olunan Berber Halil ile Dülger Dragos v. Arakil nâm zimmî şehâdetleriyle isbât etmeğin mûcebiyle müdde‘î-i [237] merkūm bi’d-def‘a husûs-ı mu‘ârazadan men‘ olunduğu huzûr-ı âlîlerine i‘lâm olundu. Fî 15 min-Şa‘bân sene [11]79.