İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 457 Hüküm no: 564 Orijinal metin no: [237-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Kerih’in varislerinin değirmen gediği davasından men olunmaları Keçeciler Değirmeni’nde gedik da‘vâ edip mukaddemâ olan ibrâ isbât Ma‘rûz, Eğin kazâsına tâbi‘ Alaşlı nâm karye ahâlîsinden olup mahmiye-i İstanbul’da Yenibahçe kurbünde Keçeciler’de vâki‘ ma‘lûmü’l-hudûd el-Hâc Ali Efendi Fırını’nda ve değirmeninde ekmekçi iken bundan akdem hâlik olan Kerih v. Bedros v. Kiragos’un? verâseti oğlunun oğulları olup hîn-i helâkinde sagīr ve hâlâ kebîr olan Sahak ve Kirkor’a ale’l-inhisâr arzuhâl eden mezbûr Sahak asâleten ve merkūm Kirkor tarafından vech-i âtî üzere vekâlet iddi‘â eden Kokas meclis-i şer‘-i şerîf-i enverde hâlik-i merkūmun mârrü’z-zikr fırın ve değirmende şerîki iken altı sene mukaddem hâlik olan Arakil v. Bedros v. Karabet’in verese-i münhasırası olup zikri âtî âlâta vaz‘-ı yed eden zevcesi Zamara ve kebîr oğulları Agob ve Baronak ve kebîre kızı Torlu’dan merkūm Baronak muvâcehesinde zikr olunan fırın ve değirmen’de mevcûd beynimizde gedik ta‘bîr olunur ikişer yüz guruş kıymetli on iki re’s bargirin nısf-ı şâyi‘i hâlik-i merkūm Arakil’in ve nısf-ı dahi vârisi olduğumuz ceddimiz hâlik-i merkūm Kerih’in mülkü olmağla şerîki merkūm Arakil’e yevmî yirmişer para ücret ile hîn-i helâkine dek on sekiz sene icâr ol dahi isticâr edip sinîn-i mezkûrede müctemi‘a olan on bin iki yüz kırk guruş ücreti kable’l-ahz hâlik olmağla bize mevrûs olup gerek ücret-i mezkûreyi ve gerek mârrü’z-zikr bargirlerin nısf-ı şâyi‘ini <> bi-gayrı hakkın vaz‘-ı yed eden merkūm Baronak’dan bi’l-verâse taleb ederiz deyü da‘vâ merkūm Baronak cevâbında müdde‘iyân-ı mezbûrânın mûrisleri hâlik-i merkūm Kerih elli sekiz senesi Şevvâli gurresinde zikr olunan bargirlerde olan nısf hissesini şerîki bizim babamız merkūm Arakil’e beş yüz guruş semen-i makbûza bey‘ ve teslîm edip hattâ işbu merkūm Sahak karındaşı merkūm Kirkor ile işbu yedimizde olan temessük mantûkunca altmış dört senesi Şa‘bânı’nın on ikinci günü bâliğ ve âkıl oldukları hâlde Kapan-ı dakīk’e gelip babamız merkūm Arakil’e bey‘-i mezkûr istiğlâl tarîkiyle olmuş idi deyü hisse-i mezkûreyi taleb ve nizâ‘ etmeleriyle babamız merkūm işbu merkūm Sahak ile karındaşı merkūm Kirkor’a üç yüz kırk guruş dahi verdikde ol dahi kabz ü kabûl ve zikr olunan hisseye müte‘allık âmme-i da‘vâdan babamız merkūm Arakil’in zimmetini ibrâ-i âm ile ibrâ ve iskāt eylediler deyü ba‘de’d-def‘ ve’l-inkâr merkūm Baronak def‘-i meşrûhunu udûlden kapan ustalarından el-Hâc Mahmud b. el-Hâc İbrahim ile zimmî ustalarından Bedros v. Artin ve Ohan v. Melkon ve Kokas v. Aleksan ve Arakil v. Aleksan şehâdetleriyle isbât etmeğin mûcebiyle müdde‘î-i merkūm Sahak bi-gayrı vech-i şer‘î mu‘ârazadan men‘ olunduğu ba‘de’t-tescîl bi’l-iltimâs huzûr-ı âlîlerine i‘lâm olundu. Fî 16 Ş sene 1179.