İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 458 Hüküm no: 565 Orijinal metin no: [237-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin ve eşi Hanife’nin vefat eden küçük çocuklarından dolayı Ebe Saliha aleyhindeki diyet davasında anlaşma sağlanması Sagīrin altı gün mürûrunda göbeğini kat‘ ba‘dehû ibrâ Mahmiye-i İstanbul’da Küçükpazar’da zikri âtî Mustafa nâm sagīrin ebeveyni olduğu mütehakkık olan Mehmed Emin b. Mustafa ve mu‘arrefetü’z-zât Hanife bt. Ahmed Çarşamba günü dîvân-ı hazret-i Sadr-ı a‘zamîde ma‘kūd meclis-i şer‘-i şerîf-i enverde Kasımpaşa’da sâkin kavâbileden kezâlik mu‘arrefetü’z-zât işbu bâ‘isetü’l-kitâb Saliha bt. Ali mahzarında her biri ikrâr ve takrîr-i kelâm edip zikr olunan sagīr oğlumuz takrîben yedi aylık iken sene-i mâziye Zilhiccesi’nin dokuzuncu günü tevellüd edip işbu mezbûre Saliha dahi ol vakitde hâzıra olduğu hâlde mu‘tâd üzere göbeğini kesip ismini Mustafa tesmiye eylediğimizden altı gün sonra gelip hilâf-ı mu‘tâd sagīr-i mezbûrun mikrâs ile amden tekrâr göbeğini kesip kat‘ ve cerh etmekle kanı münkatı‘ [238] olmayıp ol cerhden yirmi dört sâ‘at mürûrunda fevt olmağla mezbûre Saliha mûcebini taleb ve da‘vâ sadedinde olduğumuzda ol dahi inkâr etmeğin beynimizde münâza‘ât-ı kesîre vâkı‘a olmuş idi. El-hâletü hâzihi beynimize Müslimîn tavassut edip da‘vâ-i mezkûremizden mezbûre Saliha ile bizi otuz üç guruş üzerine sulh eylediklerinde biz dahi sulhu kabûl ve otuz üç guruşu ba‘de’l-hısas ahz u kabz edip oğlumuz sagīr-i mezbûr Mustafa’nın dem ü diyetine müte‘allıka âmme-i da‘vâ ve kâffe-i mutâlebâtdan mezbûre Saliha’nın zimmetini ibrâ-i küllî ile ibrâ ve iskāt eyledik dediklerinde ol dahi ibrâlarını kabûl etmeğin gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 17 min-Şa‘bân sene 1179. Şuhûdü’l-hâl: Debbâğ el-Hâc Halil, Durmuş b. İbrahim, Ali b. Hasan, Molla Mehmed b. el-Hâc Mehmed, Hüseyin Odabaşı b. Hasan, Molla Mustafa.