İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 458 Hüküm no: 566 Orijinal metin no: [238-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vakıf arsadan geçen kanalın kapatılması Keşf, der-kurb-ı Cerrâhpaşa Ma‘rûz, Vârid olan fermân-ı âlîlerine imtisâlen zikri âtî husûsun mahâllinde istimâ‘ ve faslı için kıbel-i şer‘-i şerîfden irsâl olunan müderrisîn-i kirâmdan keşif nâibimiz es-Seyyid Halil Efendi dâ‘îleri mahmiye-i İstanbul’da Cerrâhpaşa kurbünde Kürkçübaşı mahâllesinde vâki‘ avârız vakfı olan menâzilden bir tarafı Şerîfe Hatun menzili ve bir tarafdan vakf-ı mezbûrdan sâhib-i arzuhâl Süleyman b. Abdullah menzili ve bir tarafdan tarîk-i hâs ve bir tarafdan tarîk-i âm ile mahdûd derûn-ı arzuhâlde mezkûrü’l-ism diğer Süleyman b. Abdurrahman’ın tasarrufunda olan menzile varıp huzûr-ı Müslimînde akdeylediği meclis-i şer‘-i şerîf-i enverde mütevellî-i vakf-ı mezbûr hâzır olduğu hâlde mezbûr diğer Süleyman hemcivârı sâhib-i arzuhâl Süleyman’dan zikr olunan menzili kârizini hakk-ı icrâsı yoğiken bilâ-izn-i mütevellî işbu mu‘âyene olunan menzilim arsasından icrâ ve ihdâs etmekle men‘ olunsun deyü iddi‘â ve mezbûr Süleyman b. Abdullah cevâbında kâriz-i mezkûru ihdâs eylediğini ikrâr, lâkin müdde‘î-i mezbûr Süleyman işbu menzil-i mezbûru beş sene mukaddem mutasarrıfesi olan ( ) nâm hatundan hîn-i tefevvüzünde kârîz-i merkūmun arsa-i mezkûreden icrâ olunması şart kılınmağla ol dahi bu vechile tefevvüz ve kabûl etmiş idi deyü ba‘de’d-da‘vâ ve’l-inkâr mezbûr Süleyman b. Abdullah def‘-i meşrûhunu beyandan acz ile ba‘de’l-istihlâf ve’t-tahlîf kâriz-i mezkûru bâ-re’y-i mütevellî sed edip arsa-i mezkûreden icrâ etmemek iktizâ eylediğini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 15 Şa‘bâni’l-mu‘azzam sene [1]179.