İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 459 Hüküm no: 567 Orijinal metin no: [238-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atik Mustafa Paşa mahallesinden ihrâç olunan Kayıkçı Abraham ve eşi Lusik’in tekrar mahalleye dönmemeleri Mukaddemâ ihrâc olunan Abraham bu def‘a mahâlleye gelmeleri marzîleri olmadığını i‘lâm. Ma‘rûz, Mahmiye-i İstanbul’da Ayvansaray kurbünde Mustafa Paşa-i atik mahâllesi ahâlîsinden İbrahim Ağa b. Mustafa ve Hüseyin b. Osman ve sâir yirmi dört nefer mazbûtü’l-esâmi Müslimîn meclis-i şer‘-i hatîrde mahâlle-i mezkûrede sâkinler olan gāibân ani’l-meclis Kayıkçı Abraham ve zevcesi Lusik Nasrâniye kendi hâllerinde olmayıp menzillerine ecnâs-ı muhtelife cem‘ ve müskirât bey‘ ve emniyetimiz olmamağla tenbîh olundukda itâle-i lisân birle mütenebbih olmayıp ızrâr etmeleriyle işbu yedlerinde olan memhûr i‘lâm nâtık olduğu üzere mezbûrânı sene-i mâziye Zilhiccesi’nde Balat Mahkemesi’ne izhâr ve vech-i meşrûh üzere muvâcehelerinde sû-i hâllerin ihbâr ve mahâlleden ihrâçların iltimâs eylediğimizde onlar dahi mahâlle-i mezbûreden âhar mahâlle nakle ta‘ahhüd etmeleriyle menzil-i mezkûrdan hurûc etmişler idi. Hâlâ yine mahâlle-i mezbûreye gelmek irâdesinde oldukları mesmû‘umuz olmağla ef‘âl-i sâbıkālarına binâen mahâllemize yine gelmeleri marzîmiz olmadığı tekrâr i‘lâm olunmak matlûbumuzdur deyü takrîrleri iltimâslarıyla huzûr-ı âlîlerine i‘lâm olundu. Fî 20 Ş sene [1]179.