İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 460 Hüküm no: 568 Orijinal metin no: [239-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celeb esnafından Bozoğlu Ali, Mişovalı Apostol ve sairlerinin Kasabbaşı Ali Ağa’da olan alacaklarını tahsil etmeleri Kasabbaşı Ağa ile celeb ümerâsı Ma‘rûz Celeb tâifesinden arzuhâl eden Bozoğlu Ali ve Miçovalı Apostol ve Esteryo ve Kosta nâm şerîkler Kasabbaşı Ali Ağa tarafından diğer Ali mahzarında Tatarlık ve Boğdan’dan bundan akdem hâlik olan İstavrakioğlu için akçesiyle mubâya‘a eylediğimiz koyunundan mâ‘adâ kendi malımız ile dahi iştirâ eylediğimiz koyun mesfûrun koyunuyla mahlût iken kasabbaşı-i mezbûr bâ-emr-i âlî mezbûrun koyunlarıyla ma‘an zabt ve bizim koyunlarımızın Âsitâne-i aliyye’de akçesini vermek üzere tesyîr eylediği ruûs ve fiâtı beynimizde ma‘lûm koyunlarda sermâyemiz olup kasabbaşı-i mezbûrdan iddi‘â eylediğimiz on bin yedi yüz otuz altı guruşdan sekiz yüz yetmiş yedi guruşunu biz rızâlarımız ile ağnâm-ı mezbûrenin Âsitâne’ye gelince masârıfı için hat ve tenzîl ve da‘vâsından kasabbaşı-yı mezbûrun zimmetini ibrâ ve iskāt etmekle bâkī kalan dokuz bin sekiz yüz elli dokuz guruşunu kasabbaşı-yı mezbûr yedinden bi-kadri’l-hısas ahz u kabz edip mârrü’z-zikr sermâyemizden kasabbaşı-yı mezbûr Ali Ağa zimmetinde ve âdemlerinden bir ferdde aslâ alacak hakkımız bâkī kalmayıp istifâ-yı hak eyledik deyü ikrârını vekîl-i mezbûr tasdîk eylediği tescîl-i şer‘î olunup mübâşiri çavuş kulları iltimâsıyla huzûr-ı âlîlerine i‘lâm olundu. Fî 20 min-Şa‘bân sene 1179.