İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 466 Hüküm no: 580 Orijinal metin no: [242-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaldırımcı Osman’ın, kefaletten dolayı alacak iddiasında bulunduğu Mehmed ile anlaşması Hukūk Ma‘rûz, Arzuhâlde mezkûr Kaldırımcı Osman Çarşamba günü huzûr-ı âlîlerinde akdolunan meclis-i şer‘-i şerîfde arzuhâl eden el-Hâc Mehmed mahzarında mezbûrun çiftliğinde yanaşması Mustafa b. Haydar b. Ali nâm kimesneye yetmiş yedi senesi Ramazanı’nda Topkapısı’nda vâki‘ kahvede doksan dört guruş ikrâz eylediğimde mezbûr el-Hâc Mehmed kefil ve zâmin olmağla bi’l-kefâle meblağ-ı mezbûru taleb ederim deyü eylediği da‘vâsından an inkâr bâ-vesâtet-i Müslimîn yirmi guruş bedel-i makbûz mukābelesinde sulh olup ziyâde yetmiş dört guruşa müte‘allıka âmme-i da‘vâdan mezbûr el-Hâc Mehmed’in zimmetini ibrâ ve iskāt, ol dahi ibrâyı kabûl ve kat‘-ı münâza‘a eylediği mübâşiri kapı kethüdâsı kulları iltimâsıyla huzûr-ı âlîlerine i‘lâm olundu. Fî 25 min-Şa‘bân sene 1179.