İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 496 Hüküm no: 624 Orijinal metin no: [260-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saka gedikleri varislere intikal etmediğinden, vefat eden Saka Ayşe’nin varislerinin Sakabaşı Ali aleyhindeki davalarının reddedilmesi Saka gediği sakāsından da‘vâ Ma‘rûz, Mahmiye-i İstanbul’da Topkapısı dâhilinde merhûme Fâtıma Sultân mahâllesinde sâkin iken bundan akdem vefât eden Âişe bt. Abdürrezzak b. Ahmed nâm hatunun verese-i münhasırası olup arzuhâl eden zevci Mustafa odabaşı ve babasının li-ebeveyn karındaşı oğlu Mehmed Emin mahmiye-i mezbûrede meclis-i şer‘-i hatîrde bâ-berat-ı âlîşân sakabaşı olan derûn-ı arzuhâlde mezkûr Ali b. Mehmed mahzarında Balatkapısı hâricinde vâki‘ çeşmenin sakā gediği mûrisemiz müteveffât-ı mezbûre Âişe’nin yedimizde olan sakabaşı tezkiresiyle üzerine olmağla mülkü olan kırba ve arkalıç ve tasını tarafından bir nefer zimmîye icâr edip mutasarrıf iken fevt olup âlât-ı mezkûre bize mevrûs âlât-ı mezkûre zımnında gedik dahi bize intikāl etmiş iken mezbûr sakabaşı çeşme-i mezkûrdan sakālıkdan bizi men‘ eder deyü da‘vâya tasaddî edip lâkin sakabaşı-yı mezbûr yedinde olup ibrâz eylediği fermân-ı âlîşânda sakā gedikleri sakābaşı ve ihtiyârları ma‘rifetiyle bâ-tezkire mekfûl kimesnelere verilip vereseye intikāl eylemesi tasrîh [261] olunmadığından mâ‘adâ beynlerinde gedik ta‘bîr etdikleri şer‘an <> eşyâ-yı menkūleden olmayıp mezbûr sakabaşıya suâl dahi teveccüh etmediği mübâşiri çavuş kulları iltimâsıyla huzûr-ı âlîlerine i‘lâm olundu. Fî 5 Ş sene [1]179.