İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 497 Hüküm no: 625 Orijinal metin no: [261-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Piri Hatun Vakfı mütevelliliğinin vâkıf evladından olduklarını ispat eden Süleyman ve kardeşi Ayşe’ye verilmesi Pîrî Hatun Vakfı’nın evlâdiyetini isbât Ma‘rûz, Mahmiye-i İstanbul’da nezâret-i dâ‘îlerinde olan evkāfdan Unkapanı kurbünde Arabacılar Meydanı’nda Hoca Halil mahâllesinde vâki‘ Pîrî Hatun Vakfı’nın vech-i âtî üzere ber-vech-i evlâdiyet tevliyetini iddi‘â eden sâhibey-i arzuhâl es-Seyyid Süleyman ve Âişe veledey Mehmed nâm karındaşlar meclis-i şer‘-i hatîrde vakf-ı mezbûra yevmî iki akçe ile yine evlâdiyet zu‘muyla tevliyet-i mezkûreyi işbu yetmiş dokuz Cemâziyelâhiresi’nin on birinci günü evlâd-ı vâkıfdan müte‘âkiben fevt olan es-Seyyid Mehmed ve Şerîfe Rabia mahlûllerinden üzerine berat etdiren arzuhâlde mezkûre mu‘arrefetü’z-zât Âişe bt. İsmail b. Abdülkadir b. Hasan mahzarında cedde-i ulyâmız mezbûre Pîrî Hatun Vakfı’na evlâdiyet üzere mütevellîler olan müteveffiyân-ı mezbûrân es-Seyyid Mehmed ve Rabia bizim anamız Ümmühani nâm hatun ile karındaşlar olmağla mezbûretâna tevliyet-i mezkûre anası Âişe’den ona dahi anası Fâtıma’dan ona da babası Hızır’dan ona dahi anası Kamer’den ona dahi babası Ali’den ona dahi anası vâkıfe-i mezbûre Pîrî Hatun’dan intikāl edegelip ve müteveffiyân-ı mezbûrân bilâ-veled fevt olduklarında tevliyet-i mezkûre bize intikāl etmiş iken mezbûre Âişe babam mezbûr İsmail’den intikāl eyledi deyü hilâf-ı inhâ tevliyet-i mezkûreyi üzerine berat etdirmekle taleb ederiz deyü da‘vâ, mezbûre Zeyneb[Âişe] cevâbında ceddi mezbûr Hasan’dan gayrı vâkıfe-i mezbûreye müntehî olunca ensâbını ta‘dâddan âcize ve tevliyet-i mezkûreye evlâdiyet üzere istihkākını beyana kādire olamadığından mâ‘adâ derkenârda tevliyet-i mezkûre on yedi senesinde mezbûrenin babası İsmail üzerinden ref‘ olundu deyü tasrîh olunmuş iken zeylinde tevliyet-i mezkûre üzerinde iken fevt olan İsmail deyü zikr olunduğu münâkız ve mezbûrenin babam deyü iddi‘â etdiği İsmail’in ref‘inden bu târîhe gelince altmış iki sene mürûr edip dört kimesne mütevellî olup ve pederim hîn-i ref‘inde fevt oldu deyüp sinni suâl olundukda kırk beş yaşındayım demekle min-külli’l-vücûh zâhir-i hâl dahi müdde‘âsını mükezzib olmuş iken mezbûre Âişe müdde‘iyân-ı mezbûrânın nesebini inkâr etmeğin mezbûrân evlâdiyetlerini udûlden el-Hâc Mehmed b. Mustafa ve Halil b. Hüseyin ve Mustafa b. Hüseyin nâm kimesneler şehâdetleriyle vâkıfe-i mezbûreye müntehî olunca vesâit-i mezkûreyi zikr ve beyan ederek bilâ-tefsîr isbât etmeğin yedinde olan fetvâ-yı şerîfe mûcebince tevliyet-i mezkûreyi ale’l-iştirâk müdde‘iyân-ı mezbûrân Süleyman ve Âişe’ye tevcîh buyrulmak bâbında emr ü fermân hazret-i men-lehü’l-emrindir. Fî 5 min-Şevvâl sene 1179.