İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 498 Hüküm no: 627 Orijinal metin no: [261-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed’in varislerinin babalarının ortağı Haffaf İsmail’den alacak iddiasında bulunmaları Haffâf nizâ‘ı ne vechile zabt i‘lâm Medîne-i Edirne ahâlîsinden olup işbu Receb-i şerîf’in yirmi beşinci günü vefât eden eimmeden el-Hâc Mehmed Efendi b. Halil’in verâseti zevce-i menkûhaları Şerîfe Fâtıma bt. el-Hâc Mustafa ve diğer Fâtıma bt. Abdullah ile mezbûre Şerîfe Fâtıma’dan mütevellid evlâd-ı kibârı Hâfız es-Seyyid Mehmed ve es-Seyyid Abdullah ve Hadîce’ye ale’l-inhisâr arzuhâl eden mezbûr es-Seyyid Mehmed ile karındaşı mezbûr Abdullah bir gün mukaddem mahmiye-i İstanbul’da meclis-i şer‘-i hatîrde mahmiye-i mezbûrede Karaman Arastası’nda haffâf olup derûn-ı arzuhâlde zikr olunan İsmail b. Mehmed mahzarında babamız müteveffâ-yı mezbûr Mehmed Efendi fevtinden yirmi üç sene mukaddem mezbûr İsmail’e mudârebe tarîkiyle malından nakden sekiz yüz guruş ile zikr olunan arastada tasarrufunda olan dükkânda mevcûd dört yüz guruşluk haffâf metâ‘ı verip ve dükkân-ı merkūmda iskân ve hâsıl olan ribhden beher mâh on beş guruş babamıza verip ve on beşer guruş dahi kendisi almağı şart etmeleriyle ol dahi nakd-i merkūmu metâ‘a bozup metâ‘-ı evvel-i mezkûr ile ma‘an metâ‘-ı sânîyi fâide ile nakden ve nes’eten ahz-ı bey‘ ve amel edip hâlâ re’s-i mâl-ı mezkûr ile babamız mezbûrun hîn-i fevtine dek on beş ayda hâsıl olan iki yüz yirmi beş guruş yedinde olmağla re’s-i mâl-ı mezkûr ile fâide-i merkūmeden mudârebe-i mezkûrenin fesâdına binâen ecr-i mislinden mâ‘adâ seksen sehmden ikimize isâbet eden elli altı sehim üzerine hissemizi taleb ederiz deyü da‘vâ mezbûr İsmail cevâbında tarîk-i mezkûr ve kavl-i mersûm üzere müdde‘iyân-ı mezbûrânın babaları müteveffâ-yı mezbûrdan sekiz yüz guruşluk haffâf metâ‘ı alıp ba‘dehû nakden dahi dört yüz guruş alıp ve nakden ve nes’eten bey‘ eylediğini ikrâr lâkin şuhûr-ı mezkûrede ol mikdâr fâide hâsıla olmadığından mâ‘adâ işbu Cemâziyelâhiresi gāyetine gelince müteveffâ-yı mezbûra [262] kavl-i mezkûre binâen malımdan on beş guruş vermiş idim ve re’s-i mâl-ı mezkûrdan mezbûrânın hisseleri hâlâ metâ‘ıyla zimemde olmağla metâ‘ı ve zimemi alsınlar deyü eylediği def‘i sahîh olmayıp şer‘an hakk-ı bey‘ ve hakk-ı taleb mezbûr İsmail’in olmağla metâ‘ı bey‘ ve zimemden dahi deyni kendi tahsîl ve verese-i mezbûrâna teslîm lâzım geldiği zâhir olmağla beynlerini ıslâh için rızâlarına havâle olunup henüz da‘vâlarına faysal verilmediği cerîdede mazbût ve mukayyeddir. Fî 7 min-Şevvâl sene 1179.