İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 499 Hüküm no: 628 Orijinal metin no: [262-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sağrıcı esnafından Memiş’in esnaflıktan ihraç olunması Memiş’i sağrıcı esnâfından ihrâç Ma‘rûz, Mahmiye-i İstanbul’da Sağrıcı esnâfı’ndan el-Hâc Ali meclis-i şer‘-i hatîrde yine esnâf-ı mezbûreden Memiş b. Mustafa mahzarında mezbûr Memiş bir gün mukaddem kendi dükkânımda bana bıçak çekip ve yumruk ile başıma darb ve anama ve avradıma cimâ‘ lafzıyla şetm ve ırzımı hetk etdi deyü eylediği da‘vâsını yine esnâf-ı mezbûreden Ahmed b. Mehmed ve Mehmed b. Mustafa nâm kimesneler şehâdetleriyle ba‘de’l-isbât esnâf-ı mezkûrenin kethüdâları Abdülkerim ve yiğitbaşıları Mehmed ve ustalarından Molla Ahmed ve Abdi ve Süleyman ve İbrahim ve es-Seyyid Ahmed ve el-Hâc Ali ve Bekir ve Abdullah ve Hüseyin meclis-i şer‘-i şerîfe hâzirûn olup mezbûr Memiş kendi hâlinde olmayıp şâb ve emred şâkirdlerimizi izlâl ve nush-ı pend olundukda bu misillü hetk-i ırz âdet-i müstemirresidir deyü muvâcehesinde sû-i hâlini ihbâr ve te’dîben içlerinden ihrâç olunması bâbında fermân-ı âlî sudûrunu istid‘â eyledikleri iltimâslarıyla huzûr-ı âlîlerine i‘lâm olundu. Fî 7 min-Şevvâl sene 1179.