İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 500 Hüküm no: 629 Orijinal metin no: [262-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Değirmenci esnafından İsmail’in varislerinin Mustafa b. Mehmed aleyhindeki değirmen gediği iddialarında anlaşma sağlanması Değirmen gediğinden 200 guruşa ibrâ Ma‘rûz, Değirmenci tâifesinden olup arzuhâl edenlerden el-Hâc İsmail nâm müteveffânın verese-i münhasırası evlâd-ı kibârı olup kendi tarafından asil ve kız karındaşları el-Hâc Osman ve Mustafa ve Zeyneb tarafından husûs-ı âti’z-zikrde vekîl olduğu sâbit olan Mehmed ve yine tâife-i mezbûrdan Tanaş ve Ferayo ile şerîkleri olup Arnavud Yusuf nâm kimesne mefkūd olmağla bu husûs için tarafından kayyım nasb olunan oğlu Murad ve yine tâife-i mezbûreden Belik nâm hâlikin verese-i münhasıra oğlu Avanis ve zevcesi Sima ve kızı Prabiyon taraflarından vekîl olan diğer Avanis meclis-i şer‘-i hatîrde mahmiye-i İstanbul’da Zeyrek’de vâki‘ ma‘lûmü’l-hudûd değirmende mevcûd iki horos değirmene vâzı‘ü’l-yed olan el-Hâc Mustafa b. el-Hâc Mehmed mahzarında zikr olunan iki horos değirmenin gediği oniki sehim i‘tibârıyla beynimizde müşâ‘ ve müşterek iken sâbıkā ekmekçiler kethüdâsı hâzır bi’l-meclis el-Hâc Abdullah bi-gayrı hakkın ahz ve mezbûr el-Hâc Mustafa’ya bey‘ etmekle hâlâ taleb ederiz deyü iddi‘â ve mezbûr el-Hâc Mustafa cevâbında zikr olunan iki horos değirmeni ben sâhibinden isticâr etmiş idim deyüp gedik ta‘bîr olunur âlâtı olduğu inkâr ve beynlerinde nizâ‘ etmişler idi. Hâlâ mezbûr el-Hâc Mustafa rızâsıyla malından kat‘â li’n-nizâ‘ mezbûrûna iki yüz guruş verip da‘vâsından mezbûrûnun zimmetlerini ibrâ etdikde onlar dahi bi-kadri’l-hısas ahz u kabz edip zikr olunan iki horos değirmende ve âlâtında aslâ alâkaları kalmadığı ikrâr ve kat‘-ı münâza‘a eyledikleri mübâşiri Mehmed Çavuş kulları iltimâsıyla huzûr-ı âlîlerine i‘lâm olundu. Fî 9 min-Şevvâl sene 1179.