İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 500 Hüküm no: 630 Orijinal metin no: [262-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balıkpazarı’nda Peynirciler sokağındaki mescidin imamı Trabzonlu Osman’ın darb davasından men olunması İmama darb Ma‘rûz, Arzuhâl eden Trabzonî Osman sâdır olan fermân-ı âlîlerine imtisâlen meclis-i şer‘-i şerîfe ihzâr etdirdiği Balıkpazarı’nda Peynirciler sokağında handa sâkin tüccârdan arzuhâlinde mezkûr hasmı Yenişehirli Mustafa mahzarında işbu derkenâr olunan berat-ı şerîfe ile imamı olduğum sokak-ı mezkûrda vâki‘ mescidde bayramın üçüncü gecesi edâ-yı salât-ı işâ için imâmete geçdiğimde mezbûr Mustafa beni imâmetden men‘ ve enseme sille ile üç def‘a darb ve ırzımı hetk eyledi deyü da‘vâ ve mezbûr Mustafa inkâr etmeğin isre-talebi’l-beyyine mezbûr Osman şâhidim yokdur deyü ityân-ı beyyineden izhâr-ı acz ve yemîn verilmeğe tâlib olmağla mezbûr Mustafa tahlîf olunup mezbûr Osman bilâ-beyyine husûs-ı mezkûr için şer‘an mu‘ârazadan men‘ olunduğu tescîl-i şer‘î olunup mübâşiri çavuş kulları iltimâsıyla huzûr-ı âlîlerine i‘lâm olundu. Fî 5 min-Şevvâl sene 1179.