İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 504 Hüküm no: 634 Orijinal metin no: [264-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın inşa etmiş olduğu menzilinin Yusuf Ağa’nın menziline olan zararını gidermeyi taahhüt etmesi Keşf der-kurb-ı Aksaray Ma‘rûz, Sâdır olan fermân-ı âlîlerine imtisâlen kıbel-i şer‘-i enverden irsâl olunan müderrisîn-i kirâmdan keşif nâibimiz es-Seyyid Halil Efendi dâ‘îleri mi‘mâr ağa hulefâsından Hasan ve Yusuf ve sâir ümenâ-yı şer‘le mahmiye-i İstanbul’da Aksaray kurbünda Camcı Ali mahâllesinde vâki‘ Duhânîzâde Mustafa Efendi Vakfı’ndan arzuhâlde mezkûrü’l-ism el-Hâc Yusuf Ağa b. Abdullah’ın tasarrufunda olan menzile varıp akdeylediği meclis-i şer‘-i şerîfde mütevellî-i vakıf tarafından câbî el-Hâc Ömer Efendi hâzır olduğu hâlde menzil-i mezkûrun ittisâlinde vâki‘ vakf-ı mezbûrdan Dergâh-ı âlî cebecileri çorbacılarından Hasan Ağa b. Abdullah menzilinin ulyâsında vâki‘ sofa ve odalarının pencerelerinden mezbûr el-Hâc Yusuf’un kezâlik ulyâsında makarr-ı nisvân olup mezbûr Hasan Ağa’nın binâsından mukaddem olan bir bâb odasının pencerelerine ve tahte’s-semâsına havâlesi olduğu ba‘de’l-mu‘âyene mezbûr Hasan Ağa tarafından husûs-ı mezkûrda sâbitetü’l-vekâlet vekîli el-Hâc İbrahim nâm kimesne mezbûr el-Hâc Yusuf’un duvarı ittisâline müceddeden taş duvar binâ ve üzerine tuğla ile havâlesini def‘a bi’l-vekâle ta‘ahhüd etdikde mezbûr el-Hâc Yusuf dahi râzı olup ve bu minvâl üzere kat‘-ı münâza‘a eylediklerini mezbûr dâ‘îleri mahâllinde tahrîr ve gelip ümenâ ile inhâ eylediği bi’l-iltimâs huzûr-ı âlîlerine i‘lâm olundu. Fî 8 Ş sene 1179.