İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 507 Hüküm no: 638 Orijinal metin no: [265-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiryako ve Anaştaş’ın kendilerine intikal ettiğini iddia ettikleri menzilin Anaştaş ve Politimi’ye ait olduğunu tasdik etmeleri Ma‘rûz, İstinye nâhiyesine tâbi‘ Sarıyar karyesinde Yeni mahâllede sâkin iken sekiz ay mukaddem hâlik olan Bakkāl Kosta v. Dimitri nâm zimmînin verâseti zevcesi Politimi bt. Nikola ile li-ebeveyn karındaşları Kiryako ve Anaştaş’a ale’l-inhisâr merkūmun Kiryako ve Anaştaş mahmiye-i İstanbul’da meclis-i şer‘-i hatîrde mahâlle-i mezbûrede vâki‘ etrâf-ı erba‘ası Nikola ve diğer Sarı Nikola menzilleri ve tarîk-i âm ile mahdûd müfrez menzile vaz‘-ı yedleri mütehakkık olan merkūm Nikola v. Pavlid nâm zimmînin evlâdı Anaştaş ve kızı mersûme Politimi muvâcehesinde Kuds-i şerîfde vâki‘ Mar Yakub nâm kilise fukarâsının vakfı mütevellîsi Patrik Kirkor tarafından vekîli Haçador hâzır olduğu hâlde menzil-i mezkûru mûrisimiz hâlik-i merkūm Kosta’ya mülkü olmak üzere merkūmân Anaştaş ve Politimi’nin babaları hâlik-i merkūm Nikola bey‘ ol dahi mülkü olmak zu‘muyla kıbel-i şer‘-i şerîfden bu esnâda keşif olunduğu minvâl üzere dört yüz guruşluk ebniye ihdâs ve hâlik oldukda bize mevrûs olmuş idi deyü da‘vâya tasaddî etmiş idik. <> Lâkin menzil-i mezkûr fi’l-asl Fincancı Bedros nâm zimmînin mülkü olup zikr olunan Mar Yakub kilisesi fukarâsına vakf-ı müsecceli olduğu ve tedâvül-i eyâdî ile bin yüz yetmiş bir senesinde beher şehr yirmi akçe icâre ile merkūm Nikola’ya intikāl ve hâlâ hâlik oldukda evlâdı merkūmâna intikāl eylediği ma‘lûmumuz olup menzil-i mezkûrda ve ebniye-i muhdese-i merkūmede bizim aslâ alâkamız olmayıp vakf-ı mezkûr müsakkafâtındandır deyü ikrâr ve verese-i mezbûrûn dahi tasdîk eyledikleri <> rızâlarıyla mahmiye-i mezbûrede mahkeme-i muhâsebeden tescîl olunup mübâşiri çavuş kulları iltimâsıyla huzûr-ı âlîlerine i‘lâm olundu. Fî 12 min-Şevvâli’l-mükerrem sene 1179.