Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 174 Hüküm no: 252 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soğanlık köyünden Ali'nin mülk bezir revganhane ve şiruganhanesini Pendik köyünden Togodoş'a satması El-emru hasbemâ fîhi harrerehu’l-abdü’l-fakīr ileyhi subhânehû ve te‘âlâ İsmail b. eş-Şeyh İbrahim el-müvellâ-hilâfeten bi-nâhiyeti Adalar -gufira lehû- Medîne-i Üsküdar’a muzâfe Adalar nâhiyesine tâbi‘ Soğanlık nâm karye sâkinlerinden el-Hâc Ali b. el-Hâc Mehmed nâm kimesne meclis-i şer‘-i şerîfde yine nâhiye-i mezbûreye tâbi‘ Pendik nâm karye sâkinlerinden işbu râfi‘u’s-sifr Togodoş v. Diyopofito? nâm zimmî muvâcehesinde bi-tav‘ihî ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup zikr olunan Pendik karyesinde vâki‘ bir tarafdan Malamata nâm zimmî bağçesi ve bir tarafdan ba‘zen Setre ve ba‘zen Yakomi nâm zimmîler mülkleri ve iki tarafdan tarîk-i âm ile mahdûd bir bâb bezir revganhâne ve içinde bir şirûganhâne ve bir fevkānî odası ve bir samanhânesi ve bir taş anbar ve bir tahta anbarı ve iki fırını ve iki kazgan ve iki kebîr bezir küplerini ve üç sagīr bezir küplerini ve bir bi'r-i mâi ve havluyu müştemil bir kıt‘a mülk bezir revganhâne ve şirûganhânemi bi-cümleti’t-tevâbi‘ ve’l-levâhık tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin altı yüz seksen kıt‘a esedî guruşa mesfûr Togodoş’a bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eyledikden sonra semeni olan meblağ-ı mezbûr altı yüz seksen kıt‘a esedî guruşu müşteri-i merkūm el-Hâc Ali Ağa yedinden tamâmen ahz u kabz eyledim, ba‘de’l-yevm zikr olunan bezir revganhâne ve şirûganhânede benim kat‘â alâka ve medhalim kalmadı, mesfûr Togodoş zimmînin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâlis ve’l-ışrîn min-Şa‘bâni’l-mu‘azzam li-sene ışrîn ve mi'e ve elf. Şuhûdü’l-hâl: Halil Ağa b. Mustafa Ağa, Ali Beşe b. Hüseyin, Veliyyüddin Efendi b. Yahya, Hüseyin Beşe b. Hüseyin, Mehmed Beşe, Hüseyin Beşe b. Şaban, Ömer Beşe, Abdi Beşe, İbrahim Beşe.