Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 175 Hüküm no: 253 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pendik köyünden Mosiko'nun bağlarını Hüseyin Beşe'ye satması Medîne-i Üsküdar muzâfâtından Adalar nâhiyesine tâbi‘ Pendik karyesinde sâkin Mosiko v. Yamandi zimmî meclis-i şer‘-i hatîr-i lâzımü’t-tevkīrde işbu hâfizü hâze’l-kitâb Hüseyin Beşe b. Şaban nâm kimesne mahzarında ikrâr-ı tâm ve takrîr-i kelâm edip karye-i mezbûre bağlarında bir tarafdan Kiryazi zimmî bağı ve bir tarafdan Apostol zimmî bağı ve bir tarafdan dere ve bir tarafdan tarîk-i hâs ile mahdûd tahmînen üç bin çubuk kış bağımı ve yine karye-i mezbûre bağlarında vâki‘ bir tarafdan Varsamana zimmî bağı ve iki tarafdan Büyük Yani zimmî bağı ve bir tarafdan tarîk-i âm ile mahdûd tahmînen iki bin çubuk yerli bağımı safka-i vâhide ile bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı kat‘î ile mezbûr Hüseyin Beşe’ye altmış yedi kıt‘a esedî guruşa bey‘ ve teslîm ve kabz-ı semen olan meblağ-ı merkūm altmış yedi kıt‘a esedî guruşu merkūm Hüseyin Beşe yedinden bi’t-tamâm ahz u kabz eyledim, ba‘de’l-yevm bağlar-ı mahdûdeyn mezbûr Hüseyin Beşe’nin mülk-i müşterâsıdır, keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’s-selh min-Zilka‘deti’ş-şerîfe li-sene ışrîn ve mi'e ve elf. Şuhûdü’l-hâl: Süleyman Bey, İbrahim Çelebi b. İsmail, Ali Beşe b. Hasan, Ömer Beşe b. Hüseyin Yasakçı, Yamandi zimmî, Yorgi zimmî.