Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 175 Hüküm no: 254 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal köyünden Polimo'nun bağını Done ile Yorgi'ye satması Medîne-i Üsküdar muzâfâtından Adalar nâhiyesine tâbi‘ Kartal karyesi sükkânından Polimo v. Yani zimmî meclis-i şer‘-i hatîr-i lâzımü’t-tevkīrde işbu bâ‘isü hâze’s-sifr Done ve karındaşı Yorgi veledeyn İlya zimmîler mahzarlarında ikrâr ve takrîr-i kelâm edip karye-i mezbûre bağlarında vâki‘ bir tarafdan Markos zimmî bağı ve bir tarafdan el-Hâc Mehmed bağı ve bir tarafdan Vasil zimmî bağı ve bir tarafdan tarîk-i âm ile mahdûd tahmînen üç bin çubuk yerli? ve hora ile mahlûd bağımı mesfûrân Done Nasrâniye ile karındaşı Yorgi zimmîye tarafeynden îcâb ve kabûlü hâvî bey‘-i bâtt-ı kat‘î ile yüz kıt‘a esedî guruşa bey‘ ve teslîm ve kabz-ı semen eyledikde onlar dahi minvâl-i muharrer üzere iştirâ ve tesellüm ve kabz eylediklerinden sonra semeni olan meblağ-ı merkūm yüz guruşu mesfûrân yedlerinden ahz u kabz eyledim, ba‘de’l-yevm bağ-ı mahdûd-ı mezkûr mesfûrân zimmîlerin iştirâk-i seviyy üzere mülk-i müşterâlarıdır, keyfe mâ yeşâ ve yahtâr mutasarrıf olsunlar dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ ve’l-ışrîn min-Zilka‘deti’ş-şerîfe li-sene ışrîn ve mi'e ve elf. Şuhûdü’l-hâl: el-Hâc Ali Ağa, el-Hâc Mehmed Ağa, Berber İbrahim Çelebi, Hasan Çelebi Hüddâm, İbrahim Beşe, Veli el-Muhzır, Vasil zimmî, Yorgi v. Anaştaş, Miço v. Yani.