Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 176 Hüküm no: 255 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pendik köyündeki Hamza Paşazade Hanı'nda kalan şahısların kavga ederek birbirlerini yaralamaları Yâ Fettâh Medîne-i Üsküdar’a muzâfe Adalar nâhiyesine tâbi‘ Pendik nâm karye ahâlîlerinden Datyoz v. Ketorya? ve Mihal v. Todori ve İlya v. Kiryako ve sâirleri bi-ecma‘ihim meclis-i enverde her biri takrîr-i kelâm ederler ki târîh-i kitâb gecesi ba‘de’l-işâ karyemizde vâki‘ Hamza Paşazâde Hanı demekle ma‘rûf hânda müsâferet üzere sâkin olan vilâyet-i Anadolu’da İskilib nâm kasaba sâkinlerinden Abdullah b. Abdullah ve Yasef v. Arzuman nâm kimesneler hân-ı mezbûrda Kıbtiyân tâifesinden gāib ani’l-meclis Çeribaşı Ahmed ve Mustafa ve diğer Mustafa ve İvaz nâm Kıbtîler ile sâkinler iken gavga edip Kıbtiyân-ı mezbûrûn merkūmân Abdullah’ın başının sol tarafı kulağı dibinden külünk darb ve mecrûh ve merkūm Yasef’in sol tarafı kaşı üzerinden balta ile ve sağ memesi üzerinden pinyal ile urup mecrûh edip hâlâ mecrûh oldukları hâlde hân-ı mezbûrede yaturlar, kıbel-i şer‘den üzerine varılıp cârihinden suâl olunması matlûbumuzdur dediklerinde kıbel-i şer‘-i enverden Mevlânâ İbrahim Efendi b. Mehmed irsâl olunup ol dahi zeyl-i vesîkada muharrerü’l-esâmî Müslimîn ile mecrûh-ı mezbûrların üzerlerine varılıp nazar olundukda fi’l-hakīka mecrûh-ı merkūmlar han-ı mezbûrede minvâl-i muharrer üzere mecrûh oldukları hâlde yaturu mu‘âyene ve müşâhade edip ve cârihinden suâl olundukda fi’l-vâki‘ târîh-i kitâb gecesi ba‘de’l-işâ Kıbtiyân-ı merkūmûn bizi urup mecrûh eyledi, bi-emrillâhi te‘âlâ bu cerâhatden bizlere ecel isâbet ederse kātilimiz merkūmûn Kıbtîlerdir, ahâlî-i karyeden ve sâirden bir kimesne ile husûs-ı mezbûra müte‘allika da‘vâ ve nizâ‘ımız yokdur dediklerinde mevlânâ-yı mezbûr mahâllinde tahrîr ve alâ-vukū‘ihî meclis-i şer‘a gelip inhâ ve takrîr etmeğin mâ-vaka‘a bi’t-taleb ketb ve tahrîr olundu. Hurrire fi’s-sâmin min-şehri Muharremi’l-harâm li-sene hamse ve ışrîn ve mi'e ve elf. Şuhûdü’l-hâl: Ahmed Beşe b. İlyas, İbrahim Beşe b. Hüseyin, Hacıoğlu Mehmed, Yunus Beşe b. Osman, Ali Beşe b. Halil, Fazlı Beşe b. Hüseyin, el-Hâc Ali b. Mehmed, Mehmed Ağa b. Mustafa.