Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 177 Hüküm no: 256 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar ve Yoros kazalarının donanma için yapılacak fırkate ve kalitalara gerekli keresteyi biran önce kesip göndermeleri gerektiği Şerî‘at-[şi‘âr] Yoros kazâsında nâibü’ş-şer‘ olan efendi huzûrlarına, Ba‘de’t-tahiyye ve’t-teslîm inhâ olunur ki, inşâallâhu te‘âlâ evvel-i bahârda rûy-ı deryâda ihrâc olacak Donanma-yı hümâyûn-ı zafer-makrûn ile ma‘an ihrâc olunmak üzere müceddeden inşâsı fermân buyurulan fırkate ve kalitalar içün Üsküdar muzâfâtından Adalar nâhiyesinde ve Yoros kazâsında bundan kat‘ı fermân buyurulan ecnâs-ı keresteler bu ana değin tamâmen kat‘ ve irsâl ve dâhil-i Tersâne-i âmire etdirilmesi ehem ve elzem iken mücerred ihmâl ve tekâsülünüz sebebi ile bu vakte değin kat‘ ve irsâl ve dâhil-i Tersâne-i âmire etdirilmediğinden inşâsı fermân olunan fırkate ve kalitaların tehîr ve ta‘tîline bâ‘is ve bâdî olduğunuz nümâyân olmağla bundan böyle aslâ ihmâl ve müsâmaha ve bir ferd müdâhale etdirilmeyip bir gün ve bir sâ‘at mukaddem kat‘ ve iskelesine nakl ve irsâl eylemeniz bâbında bu def‘a emr-i şerîf-i âlîşân sâdır olmağla mûcebince mektûb tahrîr ve irsâl olunmuşdur ve inşâallâhu te‘âlâ ...? olundukda vusûlünde bundan böyle aslâ ihmâl ve müsâmaha olunmayıp kat‘ı fermân olunan ecnâs-ı keresteleri bir gün ve bir sâ‘at mukaddem tamâmen kat‘ ve iskeleye nakl ve icâleten ve müsâra‘aten irsâl ve dâhil-i Tersâne-i âmire etdirilmesine ziyâde sa‘y üu ihtimâm edip hilâf-ı emr-i âlîşân vaz‘ u hareketden ziyâde ihtirâz ve ictinâb eyleyesiz ve’s-selâm.