Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 177 Hüküm no: 257 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gebze nahiyesine bağlı Şeyhşems köyünün evladiyet ve meşrutiyet üzere tasarrufu için Şeyh Şems evladından İbrahim'e berat verilmesi İbrahim Ağa Şeyhlü’nün mütevellî berâtıdır. Kocaeli sancağının Gekbüze nâhiyesine tâbi‘ Şeyhşems karyesi ber-mûceb-i Defter-i hâkānî Şeyh Şems’in evlâd-ı evlâdına meşrûta ve vakfiyeti defter-i evkāfda mastûr ve mukayyed olup evlâd-ı vâkıfdan işbu râfi‘u tevkī‘-i refî‘ü’ş-şân-ı hâkānî İbrahim -zîde kadruhû- içün hâlâ evlâdiyet ve meşrûtiyet üzere mutasarrıf iken ecnebîden bazı kimesneler evlâddan olmak üzere iddi‘â ve rencîdeden hâlî olmamalarıyla yedinde olan dîvân berâtı Anadolu Muhâsebesi’ne kayd ve Bâbüssa‘âdetim ağası nezâretine ilhâk olunmak üzere fermân-ı âlî sâdır olmağla yedinde olan dîvân berâtının kaydı terkīn müceddeden merkūma ibkā ve mukarrer kılınmak ricâsın iftihârü’l-havâs ve’l-mukarrabîn mu‘temedü’l-mülûk ve’s-selâtîn bi’l-fi‘il Bâbüssa‘âdetim ağası el-Hâc Abdullah Ağa -dâme uluvvuhû- arz etmeğin hakkında mezîd-i inâyet-i pâdişâhânem zuhûra getirip ağa-yı müşârün-ileyhin arzı ve bin yüz yirmi bir senesi Cemâziyelevveli’nin yedinci günü târîhiyle müverrah verilen ruûs-ı hümâyûnum mûcebince dîvân berâtı kaydın terkīn ve Anadolu Muhâsebesi’ne kayd edip müceddeden bu berât-ı hümâyûnu verdim ve buyurdum ki mezbûr İbrahim -zîde kadruhû- varıp evlâdiyet ve meşrûtiyet üzere karye-i mezbûreye mutasarrıf olup bundan evvel ne minvâl üzere zabt ve tasarruf edegelmiş ise yine ol minvâl üzere ber-vech-i evlâdiyet ve meşrûtiyet üzere zabt ve tasarruf edip taraf-ı âhardan hiç ferd mâni‘ ve müzâhim olmayıp dahl ve ta‘arruz kılmayalar, şöyle bileler, alâmet-i şerîfe i‘timâd kılalar. Tahrîren fi’l-yevmi’s-sânî aşer min-Cumâdelûlâ sene ihdâ ve ışrîn ve mi'e ve elf. Kostantıniyye el-mahrûse.