Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 507 Hüküm no: 530 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bursa’da Mahmud Paşa Hanı’nın hancısı İsmail Beşe b. Mahmud’un haksız yere 66.875 akçesini aldığı iddiasıyla Ayşe bt. Hasan aleyhine açtığı davada iddiasını ispat edemediği Fazîletlü efendi hazretlerinin imzâsıyladır. Medîne-i Bursa’da Mahmud Paşa Hanı’nın hancısı olan İsmail Beşe b. Mahmud meclis-i şer‘-i hatîrde zikrolunan handa fevt olan Derviş b. Veli nâm kimesnenin verâseti vâlidesi Âişe bt. Hasan ile sagīr oğlu Süleyman’a münhasıra olduğu şer‘an mütehakkık oldukdan sonra sagīr-i mezbûrun tesviye-i umûruna kıbel-i şer‘den mansûbe vasîsi olan mezbûre Âişe tarafından zikri âtî da‘vâya husûmet ve redd-i cevâba vekîl olup bi-mâ-hüve nehcü’s-sübût şer‘an vekâleti sâbite olan fahrü’l-eşbâh İbrahim Beşe b. Ali nâm râcil mahzarında üzerine takrîr-i da‘vâ edip bundan akdem müvekkile-i mezbûre Âişe Hâtun medîne-i mezbûrede bi-gayrı hakkın altmış [altı] bin sekiz yüz yetmiş beş akçemi ahz u kabz etmişidi hâlâ vekîl bi’l-husûme olan mezbûrdan suâl olunup müvekkilesi bana teslîme vekîl-i mezbûre tenbîh olunmak matlûbumdur dedikde gıbbe’s-suâl vekîl-i mezbûr cevâbında müvekkilemin mûrisi olan mezbûr Derviş han-ı mezbûrda fevt oldukda mezbûr İsmail Beşe kendi âdemlerinden olan Yusuf Dilaver ile tereke-i müteveffâ-yı mezbûrdan fuzûlen altı yüz yirmi beş vakıyye kahvesini kendi istediği mevzi‘a götürdüğünü müvekkilem mezbûre Âişe târih-i kitâb senesi Rebî‘üleveli’nde medîne-i merkūmede kassâm-ı askerî olan İbrahim Efendi huzûrunda mezbûr İsmail Beşe inkâr eylediği ecilden han-ı mezbûr sükkânından es-Seyyid Hamza b. Mustafa ve el-Hâc Muharrem b. Mustafa ve Mustafa b. Ali şehâdetleriyle muvâcehesinde isbât ve edâ ve îfâsına mezbûr İbrahim Efendi’[ye] hükmedip imzâ ve hatem ve hükmünü müştemile işbu meclis-i şer‘de kırâat olunan hücceti verdikden sonra mezbûr İsmail Beşe zikrolunan kahvenin aynı müstehlek olduğuna binâen her vakıyyesi için yüz yedişer akçeden altı yüz yirmi beş vakıyye kahve bahâsından mahsûb olmak üzere meblağ-ı mezbûr altmış altı bin sekiz yüz yetmiş beş akçeyi müvekkileme teslîm ol dahi asâleten ve vesâyeten ahz u tesellüm eyledikden sonra mezbûr İsmail Beşe talebiyle müvekkilem mezbûre Âişe bin altmış yedi senesi şehr-i Recebi’nin on birinci gününde medîne-i merkūmede hâkim-i hâsim-i şerî‘at-i garrâ olan a‘lemü’l-ulemâ’i’l-izâm efdalü’l-fuzalâ’i’l-fihâm Ahmed Efendi b. Abdurrahman huzûrunda hâzır olup takrîr-i meşrûhum üzere ikrâr ve meblağ-ı mezbûr altmış altı bin sekiz yüz yetmiş beş akçeyi hükm-i mesfûre binâen ahz ve tesellümünü i‘tirâf edip müdde‘î-i mezbûr İsmail Beşe dahi müvekkilemi vicâhen tasdîk ve şifâhen tahkīk etdikde mûmâ-ileyh es-Seyyid Ahmed Efendi dahi ba‘de’t-tescîl bâlâda tafsîli mürûr ettiği vech üzere ikrâr ve tasdîki mutazammın hüccet-i şer‘iyye vermişdir ol vechile müvekkilem mezbûre Âişe meblağ-ı mezbûr altmış altı bin sekiz yüz yetmiş beş akçeyi bi-hakkın ahz etmişdir deyu def‘le mukābile ve mazmûnu min külli’l-vücûh takrîr-i meşrûhu üzere ikrâr ve tasdîki mutazammın ve târih-i mezbûr ile müverraha mûmâ-ileyh Ahmed Efendi’nin imzâ ve hatemini hâviye hüccet-i şer‘iyye ibrâz edip müdde‘î-i mezbûr İsmail Beşe muvâcehesinde kırâat ve istintâk olundukda mazmûn-ı hücceti tav‘an mu‘terif olmağın mûcebince ba‘de’l-hüküm bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’s-sâlis aşer min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Fahrü’l-akrân İvaz Ağa ser-muhzırân, Umdetü’l-a‘yân Acem Mehmed Ağa, Kadri Çelebi çukadâr, Ali Beşe çukadâr, İsmail Çelebi b. el-Hâc Mahmud, Ahmed Çelebi b. Abdullah, el-Hâc Dilaver b. Abdullah ve gayruhüm mine’l-[hâzırîn.]