Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 508 Hüküm no: 531 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Börekçi Hacı Hüseyin b. Kemal’in arsası vakıf mülk evini kızı Hadice Hatun’a altmış bin akçeye sattığı Dâru’l-hilâfeti’l-aliyye Kostantıniyye el-mahmiyye’de Sofular mahallesinde sâkin olup börekçi tâifesinden el-Hâc Hüseyin b. Kemal nâm kimesne meclis-i şer‘-i hatîr-i lâzimü’t-tevkīrde sulbiye kebîre kızı işbu râfi‘atü’l-vesîka Hadice Hâtun tarafından husûs-ı âti’z-zikri tasdîka vekîl olup nehc-i şer‘î ve tarîk-ı mu‘teber-i mer‘î üzere şer‘an vekâleti sâbite olan Süleyman Çelebi b. Mehmed mahzarında bi’t-tav‘i’s-sâf ikrâr ve i‘tirâf edip akd-i âtî sudûruna değin silk-i mülkümde ve taht-ı tasarrufumda olup mahalle-i mezbûrede vâki‘ arsasının senede merhûm Şeyh Süleyman Efendi Vakfı’na otuz beş akçe mukāta‘ası olup bir tarafı Muharrem Çelebi b. Mahmud mülküne ve bir tarafı bazen İbrahim mülküne ve bazen Şeyh Süleyman Efendi Vakfı’na ve bir tarafı Bekir Çelebi mülküne ve bir tarafı tarîk-ı hâssa müntehî üç bâb fevkānî odaları ve bir bâb tahtânî odayı ve bir matbahı ve bi’r-i mâ ve kenîfi ve havlu ve zât-ı eşcâr-ı müsmire ve gayr-ı müsmire cüneyneyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile sulbiye kızım müvekkile-i merkūme Hadice’ye altmış bin nakd-i râyic fi’l-vakt akçeye bey‘ ve teslîm ol dahi minvâl-i muharrer üzere iştirâ ve kabûl ve tesellüm eyledikden sonra semeni olan meblağ-ı mezbûr altmış bin akçeden kızım müvekkilem mersûmenin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı mezbûr kızım müvekkile-i mezbûrenin mülk-i müşterâsıdı keyfemâ teşâ’ ve hasbemâ tahtâr mutasarrıfe olsun min ba‘d benim gerek menzil-i mahdûd-ı mezbûrda ve gerek semeninde vechen mine’l-vücûh ve sebeben mine’l-esbâb hak ve alâka ve medhalim kalmadı dedikde mukırr-ı mezbûrun vech-i muharrer üzere cârî ve sâdır olan ikrârını vekîl-i mezbûr vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Lütfullah Efendi b. Halil el-imâm, Mehmed Çelebi b. Nûrullah el-müezzin, el-Hâc Ebûbekir Ağa b. Bekir, Muharrem Çelebi b. Mahmud, Ebûbekir Efendi b. Yusuf el-kâtib, Umdetü’l-ekârim Mahmud Ağa b. Ali mütevellî-i Haremeyi şerîfeyn, Mehmed Beşe b. Pîr Nefes, Bâli Çelebi b. İbahim, Yiğit Çelebi b. Osman, Hâcı Ahmed b. Hasan el-hammâmî, Ahmed Bey b. ( ) veznedar, Mustafa Çelebi b. İbrahim, Veli Çelebi b. Hasan, Ahmed Çelebi b. Hasan, Mehmed Çelebi er-râcil, Osman Beşe çukadâr, Salih Çelebi el-mukayyid.