Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 509 Hüküm no: 532 Orijinal metin no: [76b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Çelebi b. Seyyid Yahya’nın Mustafa Beşe b. Mehmed aleyhine kefaletinden dolayı açtığı alacak davasında iddiasını ispat edemediği Havâss-ı Aliyye kazâsı muzâfâtından Küçükçekmece nâhiyesinde Katakala nâm karye sâkinlerinden es-Seyyid Mehmed Çelebi b. es-Seyyid Yahya meclis-i şer‘-i hatîr-i lâzimü’t-tevkīrde işbu bâ‘isü’l-kitâb Mustafa Beş b. Mehmed mahzarında üzerine da‘vâ ve takrîr-i kelâm edip Atpazarı cânbâzlarından gāib ani’l-meclis İvaz nâm kimesne zimmetinde sekiz bin akçe hakkım olup bundan akdem meblağ-ı mezbûru merkūm İvaz’dan da‘vâ ve taleb eylediğimde edâdan imtinâ‘ etmekle beynimizde münâza‘ât-ı kesîre vukū‘undan sonra beynimize muslihûn tavassutu ile mezbûr İvaz meblağ-ı mezkûr sekiz bin akçe da‘vâsından beni iki bin beş yüz akçe üzerine sulh eyledikde ben dahi sulh-ı mezbûru kabûl eyleyip bedel-i sulh olan meblağ-ı mezbûra merkūm Mustafa Beşe tarafeynden emr ve kabûlü hâviye kefâletle kefîl olmuşidi hâlâ merkūm Mustafa Beşe’den kefâleti hasebiyle meblağ-ı mezkûru taleb ederim suâl olunsun dedikde gıbbe’s-suâl ve akībe’l-inkâr merkūm es-Seyyid Mehmed Çelebi’den müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ mezbûr Mustafa Beşe’ye merkūm es-Seyyid Mehmed Çelebi’nin gāib-i mezbûr İvaz zimmetinde bedel-i sulh-ı mezbûrdan olan iki bin beş yüz akçe kaziyye vech-i muharrer üzere kefîl olmadığına yemîn teklîf olundukda ol dahi hasbe’l-mes’ûl yemîn billâhi’l-aliyyi’l-a‘lâ etmeğin mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mehmed Efendi, diğer Mehmed Efendi, Mustafa Efendi, Salih Çelebi el-mukayyid, Osman Beşe çukadâr ve gayruhüm mine’l-[hâzırîn.]