Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 519 Hüküm no: 543 Orijinal metin no: [78b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Preşkova ve ortağı Körpe’nin yüz seksen guruş alacaklarını ödemesi için Tacir Allahverdi v. Kirkor’a iki yüz gün süre verdikleri Vilâyet-i Anadolu’da Beypazarı kasabasında Beydepesi nâm mevzi‘de sâkin kendi tarafından asîl ve şerîki olup hâlâ medîne-i İzmir’de sâkin tüccârdan Körpe v. Bağvend nâm Ermeni tarafından husûs-ı âti’l-beyânı da‘vâ ve taleb ve lâzım gelirse sulh ve ibrâya vekîl olup vekâleti medîne-i İzmir sükkânından olup hâlâ mahmiye-i İstanbul’da vâki‘ merhûme Vâlide Sultân cânibinde sâkin olan Avanis v. Şati ve Haçador v. Bogas nâm Ermeniler şehâdetleriyle şer‘an sâbite olan Preşkova v. Sanaylı nâm zimmî meclis-i şer‘-i lâzimü’t-tevkīrde tüccâr tâifesinden işbu bâ‘isü’s-sifr Allahverdi v. Kirkor nâm Ermeni muvâcehesinde bi’l-asâle ve bi’l-vekâle ikrâr ve takrîr-i kelâm edip mezbûr Allahverdi mukaddemâ ticâret tarîkiyle Frengistan’a gider oldukda semen-i misilleriyle âhara bey‘ ve semenlerinden İngiliz sefîne kapudanına deynimiz olan bin iki yüz riyâlî guruşu edâ ve teslîm ve mâ‘adâsını bize vermek için ben ve müvekkilim mezbûr Körpe beynimizde levn ve zirâ‘ı ilm-i şer‘î ile ma‘lûm beş yüz kıt‘a sof def‘ ve teslîm ol dahi ahz u tesellüm eyledikden sonra zikrolunan beş yüz kıt‘a sofu semen-i misilleri olan iki bin iki yüz elli riyâlî guruşa bey‘ ve kabz-ı semen eylediğinden sonra deynimiz olan meblağ-ı mezbûr bin iki yüz riyâlî guruşu ile emrimiz üzere İngiliz kapudanına olan bin iki yüz riyâlî guruş deynimizi edâ ve teslîm eylediğinden sonra yüz guruşunu dahi sefîne navlununa verip zimmetinde bâkī dokuz yüz elli riyâlî guruş kalmağla hâlâ meblağ-ı mezbûr dokuz yüz elli guruşu asâleten ve vekâleten [79a] mezbûr Allahverdi’den taleb ve da‘vâ eylediğimde ol dahi cevâbında zikrolunan sofların semenlerinden İngiliz sefîne kapudanına deyniniz olan meblağ-ı mezbûr bin iki yüz riyâlî guruşu emriniz ile edâ ve teslîm ve bâkīden sefîne navlununa ve gümrük ve sâir masârıf-ı ma‘lûmeye harc u sarf eylediğimden sonra zimmetimde ancak sof semenlerinden yüz yirmi riyâlî guruş bâkī kalmışdır deyu ikrâr ve ziyâdeyi inkâr etmekle beynimizde münâza‘ât-ı kesîre vâkı‘a olmuşidi el-hâletü hâzihî da‘vâ-yı mezbûrdan vesâtat-ı müslihîn ile mezbûr Allahverdi beni otuz sekiz vakıyye balıkdişi ve beynimizde mikdârı ve vasfı ilm-i şer‘î ile ma‘lûm on kutu tanbure teli ile iki yüz kıt‘a nakid riyâlî guruş üzerine inşâ-i akd-i sulh eyledikde ben dahi asâleten ve vekâletim hasebiyle sulh-ı mezbûru kabûl ve bedel-i sulh-ı mezbûrun zikrolunan otuz vakıyye balıkdişi ve on kutu tanbure teli ve nakid yirmi riyâlî guruşunu mezbûr Allahverdi yedinden ahz u kabz edip mâ‘adâsı olan yüz seksen riyâlî guruşu hâlâ edâya kudreti olmamağla istimhâl etmeğin ben dahi meblağ-ı mezbûru târih-i kitâbdan iki yüz gün tamâmına değin mezbûr Allahverdi’ye te’cîl edip ol dahi kabûl eyledikden sonra mâ‘adâ da‘vâsından mezbûrun zimmetini asâlet ve vekâletim hasebiyle ibrâ-i âm ile ibrâ ve ıskāt eyledim min ba‘d husûs-ı mezbûra müte‘allik mezbûr Allahverdi ile da‘vâ ve husûmetim yokdur eğer ba‘de’l-yevm husûs-ı mezbûre müte‘allika da‘vâ benden veyâ müvekkilimden mezbûr Allahverdi üzerine sudûr ederse inde’l-hükkâmi’l-kirâm mesmû‘a ve makbûle olmasın dedikde gıbbe’t-tasdîkı’ş-şer‘î mezbûr Allahverdi dahi meclis-i şer‘de mukırr-ı mezbûr Preşkova mahzarında ikrâr ben dahi Frengistan’dan geldiğimde müvekkil-i mezbûr Körpe’ye iki tüfenk ve bir sandık ve beynimizde ma‘lûm bazı eşyâ hibe ve teslîm etmişidim hâlâ müvekkil-i mezbûrun eşyâ-i merkūmeye müte‘allika da‘vâdan zimmetini ibrâ eyledim min ba‘d müvekkil-i mezbûr ile eşyâ-i merkūmeye müte‘allika da‘vâ ve husûmetim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mustafa Efendi b. Muharrem el-kâtib, Osman Beşe çukadâr, İsa Bey b. Ahmed, Ali Efendi ve gayruhüm.