Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 520 Hüküm no: 544 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Hasan’ın câriye bedelinden Gömlekçi Fatma bt. Ahmed’den yüz on dört guruş alacağı olduğu Mahmiye-i İstanbul’da Sofular mahallesi sâkinlerinden Fâtıma bt. Hasan nâm hâtun mahfil-i kazâda gömlekçi diğer Fâtıma bt. Ahmed nâm hâtun mahzarında üzerine da‘vâ ve takrîr-i kelâm edip mezbûre Fâtıma zimmetinde beynimizde ma‘lûme Rusiyyetü’l-asl câriye semeninden yüz altmış riyâlî guruş hakkım olup meblağ-ı mezbûrun doksan yedi guruşunu yedinden ahz u kabz edip bâkī altmış üç riyâlî guruşu dahi hâlâ taleb ederim suâl olunsun dedikde gıbbe’s-suâl mezbûr diğer Fâtıma bt. [Ahmed] cevâbında müdde‘iye-i mezbûreye vech-i muharrer üzere câriye semeninden yüz altmış riyâlî guruş deynim olup meblağ-ı mezbûrun yüz on dört riyâlî guruşu müdde‘iye-i mezbûreye edâ ve teslîm edip bâkī zimmetimde müdde‘iye-i mezbûreye ancak kırk altı guruş deynim vardır deyu ikrâr ve ziyâde on yedi guruşu def‘le mukābile edicek akībe’l-istintâk ve’l-inkâr mezbûre diğer Fâtıma’dan def‘-i mezbûrunu mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka zikrolunan câriye semeninden kabzına i‘tirâfı olan meblağ-ı mezbûr doksan yedi guruşdan ziyâde on yedi guruş dahi mezbûre diğer Fâtıma yedinden ahz u kabz etmediğine müdde‘iye-i mezbûreye yemîn teklîf olundukda ol dahi hasbe’l-mes’ûl yemîn billâhi te‘âlâ etmeğin mûcibiyle ba‘de’l-hüküm mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Osman Beşe çukadâr, İbrahim Çelebi b. Ömer, Mehmed Çelebi b. Haydar, İsa Bey b. Ahmed, Salih Çelebi el-mukayyid ve gayruhüm mine’l-[hâzırîn.]