Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 521 Hüküm no: 546 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Ali Ağa b. Nasuh’un Kara Çelebizâde Mahmud Efendi Vakfı’na olan borcunun varislerinden tahsil olunduğu Mahmiye-i İstanbul’da vâki‘ merhûm Kara Çelebizâde Mahmud Efendi Vakfı’na berât-ı âlîşân ile bi’l-fi‘il mütevellî olan Hasan Çavuş b. Hüseyin meclis-i şer‘-i hatîr-i lâzimü’t-tevkīrde vakf-ı mezbûra mütevellî iken bundan akdem vefât eden merhûm Ali Ağa b. Nasûh’un verâseti zevce-i metrûkesi Şahbaz bt. Abdullah nâm hâtun ile sulbî sagīr oğlu Osman Çelebi’ye ve sulbiye sagīre kızı İsmihan’a münhasıra olduğu şer‘an mütehakkık oldukdan sonra sagīrân-ı mezbûrânın tesviye-i emrlerine kıbel-i şer‘den mansûb vasîleri olan vâlideleri mezbûre Şahbaz Hâtun tarafından husûs-ı âti’l-beyâna sâbitü’l-vekâle vekîl olan işbu bâ‘isü’l-vesîka el-Hâc İbrahim b. Hüseyin nâm kimesne mahzarında bi’t-tevliye ikrâr ve i‘tirâf edip müteveffâ-yı mezbûr Ali Ağa zaman-ı tevliyetinde defteri mûcebince mâl-ı vakf-ı mezbûrdan zimem gösterdiği cem‘an on altı bin sekiz yüz yetmiş buçuk riyâlî guruşun iki bin [79b] dört yüz altmış bir riyâlî guruşu bilâ-rehn olup asla kābil-i tahsîl olmayıp izâ‘at etmekle tereke-i müteveffâ-yı mezbûrdan cânib-i vakf-ı mezbûra edâ etmek üzere vekîl-i mezbûr el-Hâc İbrahim’e cânib-i şer‘den tenbîh olunmuşidi hâlâ meblağ-ı mezbûr iki bin dört yüz bir guruşu tamâmen vekîl-i mezbûr el-Hâc İbrahim yedinden tevliyetim hasebiyle ahz u kabz eyledim dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Abdullah Çelebi b. ( ), İbrahim Bey b. Ömer, Osman Beşe çukadâr, Mustafa Efendi el-kâtib ve gayruhüm mine’l-[hâzırîn.]