Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 522 Hüküm no: 547 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. Mustafa’nın Hasan Paşa b. Abdülmennan’da 10.830 guruş alacağı olduğu iddiasıyla varisleri aleyhine açtığı davanın tehir edildiği Mahmiye-i İstanbul’da ( ) mahallesinde sâkin olup hâlâ Boğazhisarı muhâfazasında çavuşbaşı olan umdetü’l-emâcid ve’l-ekârim İsmail Ağa b. Mustafa tarafından husûs-ı âti’l-beyâna vekîl olup vekâleti hasm-ı câhid-i âtî mahzarında Memi Ağa b. Ömer ve Ahmed Ağa b. Mustafa nâm kimesneler şehâdetleri ile şer‘an sâbit olan işbu bâ‘isü’r-rakīm Abdurrahman Ağa b. Ali meclis-i şer‘-i hatîr-i lâzimü’t-tevkīrde sâbıkā Trabluşşam beylerbeyisi olup mahmiye-i mezbûrede Emin Bey mahallesi sükkânından iken vefât eden merhûm Hasan Paşa b. Abdülmennân’ın verâseti zevce-i metrûkesi kıdvetü’l-muhadderât Fâtıma Hâtun bt. Mustafa Ağa[’ya ve] sulbî kebîr oğlu umdetü’l-emâcid Mustafa Ağa’ya münhasıra olduğu şer‘an müte‘ayyin oldukdan sonra mezbûr Mustafa Ağa mahzarında üzerine bi’l-vekâle da‘vâ ve takrîr-i kelâm edip müvekkilim mezbûr İsmail Ağa müteveffâ-yı mezbûr Hasan Paşa’nın hayâtında Trablusşam beylerbeyisi oldukda kethüdâsı olmağla mâlından mütevffâ-yı mezbûr altı bin yüz kırk yedi esedî guruş ikrâz ve teslîm müteveffâ-yı mezbûr Hasan Paşa yedinden iktirâz ve tesellüm eylediğinden mâ‘adâ müteveffâ-yı mezbûr Hasan Paşa’nın gāib ani’l-meclis el-Hâc Salim nâm kimesneye cihet-i deyn-i şer‘îden zimmetinde dört bin altı yüz seksen üç esedî guruş deyni olup meblağ-ı mezbûra müvekkilim mezbûr İsmail Ağa müteveffâ-yı mezbûr Hasan Paşa’nın emri ile kefîl olmağla mezbûr Hasan Paşa’nın vefâtından sonra meblağ-ı mezbûr dört bin altı yüz seksen üç esedî guruşu kefâleti hasebiyle müvekkilim mezbûr el-Hâc Salim’e edâ ve teslîm eylemekle meblağ-ı mezbûr dört bin altı yüz seksen üç esedî guruş ki cem‘an on bin sekiz yüz otuz esedî guruş hâlâ müteveffâ-yı mezbûrun terekesinden müvekkilim mezbûr İsmail Ağa’ya edâsı lâzım deyn olmağla müvekkilim mezbûr için merkūm Mustafa Ağa’dan vekâleten taleb ederim suâl olunsun dedikde gıbbe’s-suâl ve akībe’l-inkâr vekîl-i mezbûrdan müdde‘âsını mübeyyine beyyine taleb olundukda udûl-i Müslimînden olup müteveffâ-yı mezbûrun hayâtında divan efendisi hizmetinde olup zikrolunan Emin Bey mahallesi sükkânından İsa Efendi b. Mehmed ve yine müteveffâ-yı mezbûrun kapıcılar kethüdâsı olup mahmiye-i mezbûrede Molla Gürânî mahallesi sükkânından Mustafa Ağa b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâdi’ş-şer‘î fi’l-hakīka müteveffâ-yı mezbûr Hasan Paşa hâl-i hayâtında Trablusşam beylerbeyisi iken kethüdâm olan mezbûr İsmail Ağa yedinden altı bin yüz kırk yedi esedî guruş iktirâz ve kabz eylemekle mezbûr İsmail Ağa’ya zimmetimde meblağ-ı mezbûr altı bin yüz kırk yedi esedî guruş deynim vardır deyu kirâren ve mirâren huzûrumuzda ikrâr ve bizi işhâd eylediğinden mâ‘adâ müteveffâ-yı mezbûr Hasan Paşa’nın gāib ani’l-meclis olan mezbûr el-Hâc Salim’e cihet-i deyn-i şer‘îden zimmetinde dört bin altı yüz seksen üç esedî guruş deyni olup meblağ-ı mezbûra müvekkil-i merkūm müteveffâ-yı mezbûrun emri ile kefîl olmağla meblağ-ı mezbûr dört bin altı yüz seksen üç esedî guruşu kefâleti hasebiyle müvekkil-i mezbûr merkūm el-Hâc Sâlim’e bizim huzûrumuzda edâ ve teslîm eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde isre ri‘âyeti şerâiti’l-kabûl şehâdetleri hayyiz-i kabûlde vâkı‘a olmağın mûcibiyle ba‘de’l-hüküm müvekkil-i mezbûr İsmail Ağa âhar diyârda olmağla tahlîf huzûruna te’hîr olunup mâ-hüve’l-vâki‘ bi’t-taleb ketb olundu. Fi’s-sâbi‘ aşer min-Zilhicceti’ş-şerîfe li-sene 1067. Şühûdü’l-hâl: Himmet Efendi b. Musa, Mustafa Bey b. Mehmed, Ali Efendi b. Abdullah, Osman Beşe çukadâr, İsa Bey b. Ahmed ve gayruhüm mine’l-[hâzırîn.]