Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 523 Hüküm no: 548 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiryazi v. Yorgi’nin otuz beş altın ve gümüş maşrabasını çaldığı iddiasıyla Papa Durmuş v. Yasef aleyhine açtığı davada iddiasını ispat edemediği Mahmiye-i İstanbul’da Yedikule kurbünden vâki‘ Mirahor mahallesi sâkinlerinden Kiryazi v. Yorgi nâm zimmî meclis-i şer‘-i hatîr-i lâzimü’t-tevkīrde damadı olan hâmilü hâze’s-sifr Papa Durmuş v. Yasef nâm zimmî muvâcehesinde üzerine da‘vâ ve takrîr-i kelâm edip târih-i kitâbdan üç gün mukaddem mezbûr Papa Durmuş mukaffel sepet sandığımdan otuz beş tâne yaldız altınımı ve bin akçe kıymetli yüz dirhem bir sîm maşrabamı ahz eylemişdir suâl olunup aynıları mevcûd ise aynılarını değil ise yevm-i ahzında olan kıymetlerinin alıverilmesi matlûbumdur dedikde gıbbe’s-suâl mezbûr Papa Durmuş husûs-ı mezbûru bi’l-külliyye inkâr edicek müdde‘î-i mezbûr Kiryazi’den da‘vâsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Papa Durmuş’a müdde‘î-i mezbûrun marrü’z-zikr altını ile sîm maşrabasın ahz etmediğine ve üzerinde bu vechile müdde‘î-i mezbûrun dahi olmadığına yemîn teklîf olundukda ol dahi alâ vefki’l-mes’ûl yemîn billâhi’l-lezî enzele’l-İncîle alâ İsa aleyhisselâm etmeğin mezbûr Kiryazi da‘vâ-yı meşrûhasından men‘ birle mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Zilhicceti’ş-şerîfe li-sene 1067. Şühûdü’l-hâl: Umdetü’l-kuzât Mehmed Efendi, Fahrü’l-akrân Ali Efendi, Fahrü’l-kuzât Ahmed Efendi, Salih Çelebi el-mukayyid ve gayruhüm mine’l-[hâzırîn.]