Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 524 Hüküm no: 549 Orijinal metin no: [79b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Mehmed’in kendisine emanet edilen eşyaları Sultan bt. Mehmed’e iadesine karar verildiği Mahmiye-i İstanbul’da Efdalzâde mahallesinde sâkine Sultan bt. Mehmed nâm hâtun meclis-i şer‘-i şerîf-i lâzimü’t-teşrîfde İsmihan bt. Mehmed nâm hâtun mahzarında üzerine da‘vâ ve takrîr-i kelâm edip mezbûr İsmihan’a mukaddemâ mülküm olan bin akçe kıymetli bir yeşil çuka divanî dolamamı ile yine bin akçe kıymetli bir çift müsta‘mel Bursa yasdıklarımı bi-tarîkı’l-vedî‘a def‘ ve tesellüm etmişidi hâlâ eşyâ-i mezbûrenin aynıları mevcûd ise aynılarını değil ise kıymet-i şer‘iyyelerini taleb ederim suâl olunsun dedikde gıbbe’s-suâl mezbûre İsmihan cevâbında fi’l-hakīka müdde‘iye-i mezbûreden vech-i muharrer üzere bir yeşil çuka dolama ve bir çift Bursa yasdığını ahz u kabz edip aynıları [80a] yedinde mevcûd olduğunu tâyi‘aten ikrâr ve i‘tirâf etmeğin alâ mûcibi i‘tirâfihâ mârrü’z-zikr dolama ile yasdıkların aynılarını müdde‘iye-i mezbûreye teslîme mukırre-i mezbûre İsmihan’a tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Zilhicceti’ş-şerîfe li-sene 1067. Şühûdü’l-hâl: Mustafa Efendi b. Muharrem, Osman Beşe çukadâr, İsa Bey b. Ahmed, Ali Efendi ve gayruhüm.