Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 524 Hüküm no: 550 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli Beşe b. Mustafa ile ortakları Hasbek ve Karagöz’ün inek satışından İnekçi Petro v. Yorgi’den iki bin dokuz yüz akçe alacakları olduğu Mahmiye-i İstanbul hısnı ebvâbından Seferikoz mahallesinde sâkin Veli Beşe b. Mustafa nâm kimesne ile şerîkleri Hasbek v. Karagöz ve Karagöz v. ( ) nâm zimmîler meclis-i şer‘-i hatîr-i lâzimü’t-tevkīrde inekçi tâifesinden Petro v. Yorgi nâm zimmî muvâcehesinde üzerine da‘vâ ve takrîr-i kelâm edip mezbûr Petro’ya târih-i kitâbdan üç ay mukaddem üç re’s karasığır ineklerimizi iki bin dokuz yüz râyic fi’l-vakt akçeye bey‘ ve teslîm ol dahi iştirâ ve tesellüm eyledikden sonra semen-i mezbûr zimmetinde kalmağın hâlâ meblağ-ı mezbûru merkūmdan taleb eylediğimizde edâda te‘allül eder suâl olunup alıverilmesin matlûbumuzdur dediklerinde gıbbe’s-suâl mezbûr Petro cevâbında fi’l-vâki‘ târih-i mezbûrda müdde‘iyyûn-ı mezbûrûndan zikrolunan üç re’s karasığır ineğini semen-i mezbûr iki bin dokuz yüz akçeye iştirâ ve kabz edip semen-i mezbûr zimmetimde bâkîdir deyu bi-tav‘ihî ikrâr ve i‘tirâf etmeğin mûcibiyle meblağ-ı mezbûr iki bin dokuz yüz akçeyi mezbûrûna edâya merkūm Petro’ya tenbîh olunup mâ-vaka‘a bi’t-taleb ketb olundu. Tahrîren fi’l-yevmi’t-tâsi‘ aşer min-Zilhicceti’ş-şerîfe li-sene 1067. Şühûdü’l-hâl: Ramazan Efendi el-kâtib, Osman Beşe çukadâr, İsa Bey b. Ahmed, Salih Çelebi el-mukayyid ve gayruhüm mine’l-[hâzırîn.]