Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 525 Hüküm no: 551 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rıdvan Efendi b. Hasan’ın Yedidivan kazası kadısı Seyyid Hasan Efendi b. Mahmud ile alacak hususunda birbirlerinin zimmetlerini ibra ettikleri Vilâyet-i Anadolu’da Yedidivan kazâsına tâbi‘ Abdurrahman nâm karye sükkânından olan Rıdvan Efendi b. Hasan tarafından husûs-ı âti’l-beyânı ikrâra vekîl olup vekâleti kazâ-i mezbûr kurâsından Emirşah nâm karye sükkânından Ömer Beşe b. Osman ve Muharrem b. Ahmed nâm kimesneler şehâdetleriyle şer‘an sâbite olan Ali Beşe b. Receb nâm râcil meclis-i şer‘de kazâ-i mezbûrdan münfasıl olup mahmiye-i İstanbul’da ( ) mahallesi[nde] sâkin olan es-Seyyid Hasan Efendi b. Mahmud mahzarında bi’l-vekâle tav‘an ikrâr ve i‘tirâf edip mezbûr es-Seyyid Hasan Efendi bundan akdem kazâ-i mezbûr kādısı olup müvekkilim mezbûru kendüye nâib etmekle yedinden ve malından iki defada cem‘an bin iki yüz akçe iktirâz ve kabz edip zimmetinde deyn olduğundan mâ‘adâ kazâ-i mezbûr ahâlîsi üzerlerine bin altmış yedi senesinde ihrâcı lâzım gelen kürekçilerini ve harc-ı lâzımesini mezbûr es-Seyyid Hasan Efendi tamâmen cem‘ ve Âsitâne’ye gelmekle müvekkilim mezbûru yine tarafından nâib nasb etmişidi lâkin mezbûr es-Seyyid Hasan Efendi sene-i mezbûre için cem‘ ve tahsîl ettiği kürekçiyi Tersâne-i Âmire’ye teslîm ve Tersâne harcını ve sâir masârıf-ı lâzımeyi bilâ-teslîm ihtifâ etmekle Tersâne tarafından emr-i âlî ile mübâşir gelip kazâ-i mezbûrda merkūm es-Seyyid Hasan Efendi’yi bulmadıkda müvekkilim nâib-i mezbûru ahz ve harc-ı Tersane-i Âmire deyu iki bin yüz elli akçesin ahz etmekle müvekkilim mezbûr dahi kazâ-i mezbûr ahâlîsi rızâlarıyla meblağ-ı mezbûru hâneye tevzî‘ ve cem‘ edip mezbûr es-Seyyid Hasan Efendi’nin müddet-i örfiyyesi tamâm oldukda mahmiye-i mezbûreye gelip cihet-i karzdan olan meblağ-ı mezbûru mezkûr Hasan Efendi’den taleb ve da‘vâ etdikde mezbûr es-Seyyid Hasan Efendi dahi müvekkilim merkūm Rıdvan Efendi’den ahâlî-i kazâ-i mezbûr benim için harc-ı râh deyu tevzî‘ ve taksîm etdikleri üç bin akçeyi cem‘ ve ahz etdin ve ondan mâ‘adâ kazâ-i mezbûru tarafımdan niyâbeten zabt ve on bin akçe mahsûl kabz eyledin deyu nizâ‘ etmekle beynlerinde muhâsamât-ı şedîde vâkı‘a olmuşidi el-hâletü hâzihî müvekkilim mezbûr Rıdvan Efendi merkūm es-Seyyid Hasan Efendi’nin zimmetini meblağ-ı mezbûr da‘vâsından ve târih-i kitâba gelince beynlerinde vukû‘ bulan hukūk-ı ma‘lûme da‘vâsından ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î merkūm es-Seyyid Hasan Efendi dahi meclis-i şer‘de vekîl-i mezbûr Ali Beşe muvâcehesinde tav‘an ikrâr ve i‘tirâf edip ben dahi müvekkil-i mezbûr Rıdvan Efendi’nin zimmetini târih-i kitâba gelince hukūk-ı ma‘lûme da‘vâsından ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d merkūm Rıdvan Efendi üzerine bi-vechin mine’l-vücûh ve sebebin mine’l-esbâb da‘vâ ve hakkım yokdur dedikde mâ-hüve’l-vâki‘ kayd şüd. Fi’l-yevmi’s-sâbi‘ aşer min-Zilhicceti’ş-şerîfe li-sene 1067. Şühûdü’l-hâl: Mehmed Efendi b. Veli Efendi, Mü’minzâde Mehmed Efendi, Keşfî Mustafa Efendi, Osman Beşe çukadâr, İsa Bey b. Ahmed ve gayruhüm mine’l-[hâzırîn.]