Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 526 Hüküm no: 552 Orijinal metin no: [80a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Abdullah’ın emanet verdiği eşyalarını kendisine iade etmeleri için Ali Efendi b. İbrahim ile karısı aleyhine açtığı davada iddiasını ispat edemediği Medine-i Ebî Eyyûb-i Ensârî radıye anhû rabbühü’l-bârî mahallâtından Sel mahallesi sâkinelerinden Rukiye bt. Abdullah nâm hâtun meclis-i şer‘-i hatîr-i lâzimü’t-tevkīrde kazâ-i Ebî Eyyûb-i Ensârî’ye tâbi‘ Hasköy’de vâki‘ Turşucu mahallesi imâmı olan Ali Efendi b. İbrahim ile zevcesi Sâfiye bt. Abdullah nâm hâtun mahzarında üzerlerine da‘vâ ve takrîr-i kelâm edip târih-i kitâbdan yedi sene mukaddem mezbûr Ali Efendi ile zevcesi merkūme Sâfiye yedlerine silk-i mülkümde münselik olan eşyâmdan bir sîm raht kuşak ve on aded düğme ve bir devetüyü köhne ferâce ve bir dârâyi kaftanımı îdâ‘ ve teslîm onlar dahi vech-i muharrer üzere yedimden istîdâ‘ ve tesellüm eylemişler idi hâlâ taleb ederim suâl olunsun dedikde gıbbe’s-suâl ve akībe’l-inkâr müdde‘iye-i mezbûreden müdde‘âsını mübeyyine beyyine taleb olundukda ityân-ı beyyineden izhâr-ı acz ve istihlâf etmeğin fi’l-hakīka mezbûrân Ali Efendi ve zevcesi merkūm Sâfiye’ye vech-i muharrer üzere târih-i mezbûrda müdde‘iye-i merkūme yedinden eşyâ-i mezbûreyi istîdâ‘ ve tesellüm etmeyip ol vechile eşyâ-i mezbûrenin müdde‘iye-i mezbûreye yedlerinden red ve teslîmi vâcib değil idiğine yemîn teklîf olundukda onlardan herbirisi dahi hasbe’l-mes’ûl yemîn billâhi te‘âlâ etmeğin mûcibiyle müdde‘iye-i mezbûre bî-vech mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe li-sene 1067. Şühûdü’l-hâl: Sefer Çavuş b. Muharrem el-mübâşir, Abdullah Çelebi b. Ahmed el-müezzin, Mehmed b. Kasım el-müezzin, Mehmed Çelebi b. Musa, Osman Beşe çukadâr, İbrahim Bey b. Ahmed, Salih Çelebi el-mukayyid.