Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 528 Hüküm no: 554 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Mahmud Beşe’nin merhum Seyyid Halil’de alacağı olduğu iddiasıyla varisleri tarafından diğer varisler aleyhine açılan davada iddialarını ispat edemedikleri Efendi hazretlerinin imzâsıyladır. Mahmiye-i İstanbul’da Kapani Dede mahallesinde sâkin iken bundan akdem fevt olan Mahmud Beşe b. Abdullah’ın li-ebeveyn er karındaşı kızları ve zât-ı rahm cihetinden hasrân vâriseleri olan Âişe ve Âmine bintey Mustafa nâm hâtunlar divan-ı sa‘âdet-makrûnda ma‘kūd mahfil-i kazada mahmiye-i mezbûrede Beyceğiz mahallesinde sâkin iken fevt olan es-Seyyid Halil b. es-Seyyid Ahmed’in sulbî kebîr oğlu ve tereke-i vâfiyyesine vâzı‘u’l-yed olan işbu râfi‘ü’l-kitâb es-Seyyid Hasan Çelebi mahzarında herbiri üzerine takrîr-i da‘vâ edip mûrisimiz müteveffâ-yı mezbûr Mahmud Beşe’nin cihet-i karzdan Hüsrevzâde demekle şehir Ali Efendi zimmetinde bin kıt‘a riyâlî guruş hakkı olup meblağ-ı mezbûra mezkûr es-Seyyid Halil hayatında emr ve kabûlü hâviye kefâletle kefîl bi’l-mâl olup meblağ-ı mezbûru kable’l-ahz ve’l-istîfâ mezbûr Mahmud Beşe fevt olmakla bi-hasebi’l-irsi’ş-şer‘î bize intikāl ettikden sonra kefîl-i mezbûr dahi meblağ-ı mezbûru bize edâ etmedin zimmetinde iken fevt olmuşidi hâlâ tereke-i vâfiyyesinden bana edâya mezbûr es-Seyyid Hasan Çelebi’ye tenbîh olunmak matlûbumdur dediklerinde gıbbe’s-suâl mezbûr es-Seyyid Hasan Çelebi fi’l-vâki‘ kaziyye vech-i meşrûh üzere olup lâkin meblağ-ı mezbûr bin riyâlî guruşu babam müteveffâ-yı mezkûr es-Seyyid Halil hayatında mezkûr Mahmud Beşe’ye hayatında tamâmen def‘ ve teslîm edip mezbûr Mahmud Beşe dahi ahz u kabz eyledi deyu def‘le mukābile edicek gıbbe’l-istintâk ve’l-inkâr mezbûr es-Seyyid Hasan’dan def‘-i mezbûrunu mübeyyine beyine taleb olundukda udûl-i Müslimînden olup mahmiye-i mezbûrede Sultanhamamı kurbünde sâkin Hasan Beşe b. Ömer ve Mehmed Beşe b. Hüseyin nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu es-Seyyid Hasan Çelebi’nin babası mezkûr es-Seyyid Halil hayatında meblağ-ı mezbûr riyâlî guruşu bi-hükmi’l-kefâle müdde‘iyetân-ı mezbûretân Âişe ve Âmine’nin mûrisleri olan müteveffâ-yı mezbûr Mahmud Beşe hayatında bizim huzûrumuzda edâ ve îfâ edip mezbûr Mahmud Beşe dahi ahz u kabz eyledi biz bu husûsa bu vech üzere şâhidleriz şehâdet eder deyu herbiri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hüküm mâ-vaka‘a kayd şüd. Fî evâsıtı Zilhicceti’ş-şerîfe li-sene 1067. Şühûdü’l-hâl: Umdetü’l-a‘yân Mehmed Ağa, İvaz Ağa ser-muhzırân, Salih Ağa, İbrahim Ağa ve gayruhüm.