Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 535 Hüküm no: 561 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Hüseyin Beşe b. Abdullah’ın satın aldığı cariyenin ayıplı olduğu iddiasıyla Ayşe bt. Receb’e iade etmek üzere açtığı davada iddiasını ispat edemediği Mahmiye-i İstanbul’da Alacamescid kurbünde Çakır Ağa mahallesi sükkânından esirci tâifesinden Hüseyin Beşe b. Abdullah meclis-i şer‘-i hatîrde medîne-i Ebî Eyyûb-i Ensârî mahallâtından Çölmekçi mahallesi sâkinelerinden Âişe bt. Receb nâm hâtun mahzarında üzerine takrîr-i da‘vâ edip işbu uzun boylu göğ elâ gözlü Rusiyyetü’l-asl La‘lgûn bt. Abdullah nâm câriye-i memlûkesini târih-i kitâbdan kırk gün mukaddem veled getirmemişdir deyu ayb-ı velâdetden sâlime olmak üzere yüz elli riyâlî guruşa tarafeynden îcâb ve kabûlü hâvî bey‘-i bât ile bana bey‘ ve teslîm ben dahi iştirâ ve tesellüm ve def‘-i semen etmişidim lâkin merkūme La‘lgûn mezbûre Âişe Hâtun’un silk-i mülkünde üç def‘a veled getirip ayb-i velâdet ile ma‘yûbe olduğuna muttali‘ oldum hâlâ câriye-i mezbûreyi ayb-i mezkûr ile ma‘yûbe olmağın merkūme Âişe Hâtun’a red ve semen-i merkūmun mezbûreden alıverilmesin taleb ederim suâl olunsun dedikde merkūme Âişe Hatun cevâbında câriye-i mezbûrenin vech-i meşrûh üzere silk-i mülk-i sahîhinde üç def‘a veled getirdiğine tav‘an i‘tirâf edip lâkin câriye-i mezbûreyi ayb-i mezkûrdan sâlime olmak üzere bey‘ini inkâr edicek müdde‘î-i mezbûrdan merkūme Âişe Hâtun’un câriye-i mezkûreyi ayb-i mezkûrdan sâlime olmak üzere bey‘ini mübeyyine beyyine taleb olundukda ityân-ı beyyineden izhâr-ı acz ile merkūme Âişe Hâtun’u istihlâf edicek merkūme Âişe Hâtun’a câriyesi merkūme La‘lgûn’ü ayb-ı mezkûrdan sâlime olmak üzere bey‘ etmediğine yemîn teklîf olundukda ol dahi alâ vefki’l-mes’ûl yemîn billahi’l-aliyyi’l-a‘lâ etmeğin müdde‘î-i mezbûr Hüseyin Beşe da‘vâ-yı meşrûhasından men‘ olunup mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Umdetü’l-kuzât Abdülcelil Efendi b. ( ), Ahmed Çelebi b. Abdürrahim, İsa Bey b. Ahmed, Ahmed Çelebi b. Abdurrahman, Çukadâr Osman Beşe ve gayruhüm.