Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 537 Hüküm no: 563 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Çakır’ın aldığı borç karşılığında Eğin kazasındaki mülk bağını Mircan v. Melkon’a yedi aylığına rehin verdiği Vilâyet-i Anadolu’da Eğin kazâsına tâbi‘ Vank nâm karye ahâlîsinden Nikola v. Çakır nâm Ermeni meclis-i şer‘-i hatîr-i lâzimü’t-tevkīrde karye-i mezbûreden işbu bâ‘isü’l-vesîka Mircan v. Melkon nâm Ermeni muvâcehesinde tav‘an ikrâr ve i‘tirâf edip zikri âtî akdin sudûruna değin silk-i mülk-i sahîhimde münselik mülk ve hakkım olup karye-i mezbûre sınırı dâhilinde vâki‘ bir tarafı Melkon v. Harateb bağına ve bir tarafı Gral Keşiş v. Vasil bağına ve bir tarafı Hoçuk v. Bahadır bağına ve bir tarafı Arıcan v. Bağdasar nâm Ermeni bağına müntehî olup bir bâb fevkānî ve bir bâb tahtânî odayı müştemil olan bir kıt‘a cemî‘ mülk bağımı mezkûr Mircan’a târih-i kitâbdan yedi ay tamâmına değin dört yüz seksen kıt‘a riyâlî guruşa bi-tarîkı’l-bey‘ bi’l-vefâ bey‘ edip ol dahi minvâl-i muharrer üzere iştirâ ve kabûl ettikden sonra semen-i mezkûr dört yüz seksen kıt‘a riyâlî guruşu bana def‘ ve teslîm edip ben dahi yedinden tamâmen ahz u kabz eyledikden sonra zikrolunan bağı mahallinde zabt u tasarrufa tarafımdan mezkûr Mircan’ı taslît eyledim dedikde mukırr-ı mezbûrun vech-i meşrûh üzere cârî ve sâdır olan ikrârını el-mukarru lehü’l-mezkûr Mircan vicâhen ve şifâhen tasdîk ve tahkīk edicek mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe li-sene 1067. Şühûdü’l-hâl: Mustafa Efendi el-kâtib, İsa Bey b. Ahmed, Ca‘fer b. Abdullah, Osman Beşe çukadâr, Ali Efendi ve gayruhüm mine’l-[hâzırîn.]