Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 538 Hüküm no: 564 Orijinal metin no: [82b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumcu Argiri v. İstani’nin vakıf mumhanedeki yarım tasarruf hissesi ile on bin akçesini oğlu Yani’ye teslim ettiği Fi’l-asl Vilâyet-i Rumeli’nde Yenişehir kazâsı muzâfâtından Fener nâhiyesine tâbi‘ Zelinça nâm karye sükkânından olup hâlâ medîne-i Ebî Eyyûb-i Ensârî’de Zal Paşa Câmi‘-i şerîfi kurbünde vâki‘ merhûm Müftî Mehmed Efendi Vakfı’ndan olan mumhânede mumcu ve zikrolunan mumhânenin nısf-ı şâyi‘ine icâre-i mu‘accele-i ma‘lûmeteyn ile mutasarrıf olan Argiri v. İstani nâm zimmî meclis-i şer‘-i şerîf-i lâzimü’t-teşrîfde sulbî kebîr oğlu işbu bâ‘isü’s-sifr Yani nâm zimmî muvâcehesinde tav‘an ikrâr ve takrîr-i kelâm edip hâlâ ben sıla-i rahm etmek için karye-i mezbûreye gitmek murâd etmekle oğlum mezbûr Yani’ye zikrolunan mumhânede olan nısf hisse-i şâyi‘amı teslîm eylediğimden gayrı sermaye olmak üzere yedine nakid on bin akçe dahi teslîm ol dahi yedimden ahz u tesellüm edip mârrü’z-zikr mumhânede işlemeğe oğlum mesfûr Yani’ye izin verdim dedikde merkūm Yani dahi babası mukırr-ı merkūmu kelimât-ı meşrûhasında bi’l-müvâcehe tasdîk ve tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mustafa Beşe b. Ali çukadâr Hasan Efendizâde, Mustafa Bey b. Mehmed tâbi‘-i kādıasker aşcı, Mustafa Bey b. Ahmed tâbi‘-i kādıasker efendi aşcı, Ramazan Efendi el-kâtib, İsa Bey b. Ahmed, Osman Beşe çukadâr ve gayruhüm mine’l-[hâzırîn.]