Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 555 Hüküm no: 585 Orijinal metin no: [85b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Şatır v. Nordek’in Mıgırdiç v. Kirkor’un arsası vakıf mülk odalarına müdahalesinin engellenmesi Medine-i Üsküdar’da Yenimahalle sükkânından Mıgırdiç v. Kirkor nâm Ermeni meclis-i şer‘-i hatîrde mahmiye-i İstanbul’da Kumkapı kurbünde Muhsine Hâtun mahallesi sükkânından olup zikri âtî odaya vâzı‘u’l-yed olduğu şer‘an mütehakkık ve sâbit olan Derzi Şatır v. Nordek nâm zimmî mahzarında mahmiye-i mezbûrede vâki‘ merhûm Molla Hüsrev Evkāfı’na meşrûtiyet üzere mütevellî olan Sâliha nâm hâtun tarafından vekîl olup yine evkāf-ı mezbûreye câbî olan Mehmed Çelebi huzûrunda merkūm Şatır üzerine takrîr-i da‘vâ edip mezkûr Molla Hüsrev Evkāfı’ndan mahmiye-i mezbûrede Mumcu sûku ardında vâki‘ olup hudûdu beynimizde ma‘lûm olan tahtânî ve fevkānî iki bâb odanın mu‘accelesi ve beher mâh yirmi akçe müeccele ile ma‘rifet-i mütevellî ile nısf-ı şâyi‘i benim ve nısf-ı şâyi‘-i âharı merkūm Şatır’ın taht-ı tasarrufumuzda iken merkūm Şatır oda-i mezkûreden benim nısf-ı şâyi‘ hisseme dahi bi-gayrı hakkın vaz‘-ı yed eylemişdir suâl olunup oda-i mezbûrenin nısf-ı şâyi‘i merkūm Şatır yedinden nez‘ ve bana teslîm olunmasın taleb ederim dedikde gıbbe’s-suâl merkūm Şatır cevâbında fi’l-hakīka oda-i mezbûrenin vech-i meşrûh [üzere] nısf-ı şâyi‘i benim ve nısf-ı şâyi‘-i âharı merkūm Mıgırdiç’in olmak üzere taht-ı yedimizde ve tasarrufumuzda iken bin altmış ( ) Zilhiccesi’nde vâki‘ olan harîkde mahmiye-i mezbûrede vâki‘ bezzâzistân-ı atîk ve etrâfında olan cemî‘ esvâk muhterik oldukda etrâfına sirâyeti mazarratını def‘ için taraf-ı Saltanat-ı [86a] aliyye’den Mumcu sükûnda olan dekâkîn bi’l-külliyye hedm olunmağla oda-i mezkûre dahi sûk-ı mezkûrda olan dekâkîne muttasıl olduğu ecilden ma‘an hedm olunup arsa-i sırfa kaldıkda vakıfdan binâya müsâ‘ade olmakla mütevellî-i vakf-ı mezbûr oda-i mezkûreyi mu‘accelenize mahsûb olmak üzere malınız ile binâ edin deyu bi’d-defe‘ât bana tenbîh etmekle ben dahi şerîkim müdde‘î-i mezbûr Mıgırdiç’e ale’l-iştirâk bi’l-müzâyede mu‘accelemize mahsûb olmak üzere binâ edelim deyu bi’d-defe‘ât teklîf eylediğimde merkūm Mıgırdiç cevâbında arsa-i mezkûre üzerine vech-i meşrûh üzere binâdan ibâ ve arsasında olan nısf-ı şâyi‘ hissesinden kasr-ı yed etdikde ben dahi binâ-i sukūfa kemâl-i vukūfu olan bî-garaz Müslimîne oda-i mezkûrenin nukzını tahmîn etdirdiğimde nukz-ı oda-i mezkûr ancak beş yüz akçedir deyu tahmîn-i sahîh ile tahmîn ve takvîm eylemeleriyle arsa-i hâliye-i mezkûre üzerine mu‘acceleme mahsûb olmak üzere mâlım ile izn-i mütevellî-i vakıf ile müceddeden üç tabaka üç bâb oda binâ eyledim hâlâ cemî‘ ebniye-i oda-i mezkûre ve arsası taht-ı yedimde ve tasarrufumdadır deyu def‘le mukābile edicek gıbbe’l-istintâk mezbûr Mıgırdiç oda-i mezkûrenin cemî‘ ebniyenin harîk-ı mezkûrda hedm olunup arsa-i sırfa kaldığını ve ba‘dehû merkūm Şatır’a mütevellî-i vakf-ı mezbûr vech-i meşrûh üzere mu‘acceleye mahsûb olmak üzere binâya tenbîhi ile merkūm Şatır dahi kendüye vech-i meşrûh üzere binâya teklîfini ve ba‘de’l-ibâ arsa-i mezbûrenin nısf-ı şâyi‘inden kasr-ı yedini ve merkūm Şatır’ın nukz-ı mezbûru beş yüz akçeye tahmîn etdirdikden sonra arsa-i mezbûre üzerine malı ile mu‘accelesine mahsûb olmak üzere izn-i mütevellî ile üç tabakada üç bâb oda binâ ettiğini bi’l-külliyye inkâr edicek mezbûr Şatır’dan def‘-i meşrûhunu mübeyyine beyyine taleb olundukda udûl-i Müslimînden mahmiye-i mezbûrede Karabaş mahallesinde sâkin olup hâlâ terziler kârhânesinde basmacıbaşı olan Mehmed Beşe b. Abdullah ve Akşemseddin mahallesi sükkânından Ramazan b. Veli nâm kimesneler li-ecli’ş-şehâde meclis-i şer‘-i hatîrde hâzırân olup gıbbe’l-istişhâd herbiri münkir-i merkūm Mıgırdiç muvâcehesinde şehâdet edip fi’l-hakīka sene-i mezkûrede vâki‘ olan harîkin etrâfına sirâyetini def‘ için taraf-ı Saltanat’dan zikrolunan Mumcu sûku bi’l-külliye hedm olunup arsa-i sırfa kalmağla mütevellî-i vakf-ı mezbûr merkūm Şatır’a oda-i mezkûreyi mu‘accelenize mahsûb olmak üzere malınız ile binâ edin deyu bi’d-defe‘ât tenbîh etmekle mezbûr Şatır dahi bizim huzûrumuzda müdde‘î-i mezbûr Mıgırdiç’e arsa-i mezbûr üzerine ma‘an ke’l-evvel odalar binâsı için bi’d-defe‘ât teklîf etdikde mezbûr Mıgırdiç dahi binâdan ibâ ve arsada olan nısf-ı şâyi‘ hissesinden kasr-ı yed ve bi’l-külliyye binâya mezbûr Şatır’a izin vermekle merkūm Şatır dahi oda-i mezkûrenin nukzını bî-garaz Müslimîne beş yüz akçeye tahmîn ve takvîm etdirdikden sonra cemî‘ arsa-i mezkûre üzerine mu‘accelesine mahsûb olmak üzere malı ile izn-i mütevellî ile müceddeden üç tabakada üç bâb oda binâ etmişdir hâlâ arsa-i mezkûre-i mevkūfe üzerinde vâki‘ olan odaların ebniye-i cedîdesinde müdde‘î-i mezbûr Mıgırdiç’in alâka ve hakkı yokdur biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle oldukdan sonra şehâdet-i mezkûre mûcebince müdde‘î-i merkūm Mıgırdiç da‘vâ-yı meşrûhasından men‘ olunup mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mehmed Efendi el-kâtib, Mehmed Çelebi el-kâtib, Ramazan Efendi el-kâtib, Ali Efendi el-kâtib, Mustafa Efendi el-kâtib, Mukayyid Mehmed Çelebi b. Musa Efendi, Çukadâr Osman, İsa Bey b. Ahmed.