Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 558 Hüküm no: 587 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Kalef v. Daron’un kefaletinden dolayı kendisine borcu olduğu iddiasıyla Haham Gavril v. Yahuda Vaskali aleyhine açtığı davada sulh olup zimmetini ibra ettiği Husûs-ı âti’l-beyânın mahallinde tahrîri iltimâs olunmağın savb-ı şer‘-i hatîrden Mevlana Mehmed Efendi b. Veli Efendi irsâl olunup ol dahi mahmiye-i İstanbul’da Bahçekapısı kurbünde Meydancık nâm mevzi‘de Hekimzâde demekle ma‘rûf Yahudi’nin menziline varıp zeyl-i kitâbda mastûru’l-esâmi olan Müslimîn huzûrunda akd-i meclis-i şer‘-i hatîr etdikde Vilâyet-i Rumeli’nde vâki‘ Yanya kasabası kal‘ası dâhilinde sâkin olan Kalef v. Daron nâm Yahudi tarafından husûs-ı âti’l-beyânı ikrâra vekîl olup vekâleti mahmiye-i mezbûrede zikrolunan Meydancık’da sâkin Kedüz cemâ‘atinden Yasef v. Yantof ve mahmiye-i mezbûrede Çelebioğlu mahallesinde sâkin Spinoza cemâ‘atinden Salamon v. Yako ve Portakal cemâ‘atinden İsak v. Salamon ve yine Kedüz cemâ‘atinden Yasef v. Avraham nâm Yahudiler şehâdetleriyle şer‘an sâbite olan mahmiye-i mezbûrede zikrolunan Bahçekapısı kurbünde sâkin olan Kordova cemâ‘atinden Harun v. Mosi nâm Yahudi meclis-i ma‘kūd-ı mezbûrda nefs-i Yanya kasabası sükkânından hâmilü hâze’l-kitâb Haham Gavril v. Yahuda Vaskali nâm Yahudi mahzarında bi’l-vekâle tav‘an ikrâr ve i‘tirâf edip müvekkilim mezbûr Kalef bundan akdem merkūm Haham Gavril üzerine nefs-i Yanya’da iken hâlik olan Semuyil v. Hayim üzerinde cihet-i karz-ı şer‘îden olan iki bin riyâlî guruş hakkıma sen emr ve kabûlü hâviye kefâlet-i sahîha-i şer‘iyye ile kefîl olmuşidin zikrolunan iki bin guruşu ben mezbûr Semuyil’den kable’l-istîfâ merkūm Semuyil hâlik olmakla meblağ-ı mezbûru bi-hükmi’l-kefâleti’l-meşrûha senden talebederim dedikde merkūm Haham Gavril cevâbında kefâlet-i meşrûhayı bi’l-külliyye inkâr ve mürâfa‘a-i şer‘-i şerîf olduklarında müvekkilim mezbûr Kalef ityân-ı beyyine için istimhâl edip mehl-i şer‘î verildikde müvekkilim mezbûrun şühûdu Ordu-yı Hümâyûnda olmakla varıp kendilerin ihzâra mecâli olmadığı ecilden hâlâ Ordu-yı Hümâyûn nüzûl ettiği Kal‘a-i Sultaniyye’de kādı olan Mevlana Tatar Mustafa Efendi huzûrunda isbât ve nakl-i şer‘î alıp şühûd tarîkı ile mahmiye-i mezbûreye gelip merkūm Haham Gavril ile tekrâr mürâfa‘a-i şer‘ olduklarında mevlânâ-yı mezkûr kıbelinden vârid olan naklin zeylinde olan imzâda mezbûr Mustafa Efendi ancak kendi ismini tahrîr edip babası ismini zikr etmeyip ve mühründe dahi ancak kendi ismi mevcûd olmakla şühûd-ı tarîkden mevlânâ-yı mezkûrun babası ismi suâl olundukda adem-i ilmlerinden nakl-i mezkûr nâfiz olmayıp bâtıl olduğu ecilden müvekkilim mezbûr Kalef ile merkūm Haham Gavril beynlerinde niza‘-i mezkûr mütemâdî bi’l-âhare beynlerine muslihûn tavassut edip müvekkilim mezbûr Kalef zeyl-i kitâbda mastûru’l-esâmi olan hahamlarımız muvâcehesinde mezkûr Haham Gavril an-inkâr üç yüz riyâlî guruş üzerine sulh eylediklerinde mezbûr Kalef dahi sulh-ı mezbûru tav‘an ve rağbeten kabûl ve bedel-i sulhu dahi bi’t-tav‘ meclis-i sulhda mezbûr yedinden tamâmen ahz u kabz edip mezbûr Haham Gavril’in zimmetini da‘vâ-yı mezkûrdan ve târih-i kitâba gelince mezbûr Gavril üzerine asâleten ve kefâleten ve vesâyeten vukū‘ bulan âmme-i de‘âvâdan ve eymân ve muhâsamâtdan ibrâ-i âmm-ı kātı‘u’n-nizâ‘la ibrâ ve ıskāt edip hatta müvekkilim mezbûr, merkūm Gavril hahamlarımız muvâcehesinde dest-i hat ta‘bîr olunur tezkire dahi vermişdir min ba‘d müvekkilim mezbûr Kalef’in merkūm Gavril üzerine husûs-ı mezkûr ve sâir hukūk-ı ma‘lûmeye müte‘allik târih-i kitâba gelince bi-vechin mine’l-vücûh ve sebebin mine’l-esbâb da‘vâ ve hakkı yokdur dedikde eğer mezbûr Kalef da‘vâ dahi ederse lede’l-hükkâmi’l-kirâm mesmû‘a ve makbûle olmaya dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ve ba‘dehû meclis-i şer‘a gelip vukū‘u üzere ihbâr ve takrîr edicek mâ-hüve’l-vâki‘ bi’t-taleb ketb olundu Fi’l-yevmi’t-tâsi‘ aşer min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Es-seyyid Ahmed Ağa b. es-Seyyid Mehmed Efendi, Tatar Âhi Ya‘kub b. el-Hâc Bayram, Ahmed Çelebi b. Yusuf, Ahmed b. Abdullah ve gayruhüm mine’l-[hâzırîn.]