Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 559 Hüküm no: 588 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selim Beşe b. Süleyman’ın kardeşi Abdurrahman’ı öldürdüğü iddiasıyla Sipahi Halil Bey aleyhine açtığı kısas davasında iddiasını ispat edemediği Ordu-yı hümâyûnda vâki‘ olmuşdur. Mahmiye-i İstanbul’da Tavukpazarı kurbünde Hüseyin Ağa mahallesinde sâkin iken bundan akdem mahmiye-i mezbûre hısnı ebvâbından Bahçekapısı dâhilinde Tahtaminare mahallesinde mecrûhan maktûl bulunan Abdurrahman b. Mehmed’in li-ebeveyn karındaşı oğlu ve bi’l-inhisâr vârisi olan Selim Beşe b. Süleyman mahfil-i kazâda ebnâ-i sipâhi[yân]dan işbu bâ‘isü’l-kitâb Halil Bey b. Osman mahzarında üzerine da‘vâ ve takrîr-i kelâm edip mezbûr Halil Bey târih-i kitâbdan on yedi gün mukaddem mûrisim merkūm Abdurrahman’ı bi-gayri vech-i şer‘î mûcib-i kısâs olan beyâz hançer ta‘bîr olunur âlet-i câriha ile sol omuzundan urup katl eylemişdir suâl olunup mûcib-i şer‘îsi icra olunmak murâdımdır dedikde gıbbe’s-suâl ve’l-inkâr müdde‘î-i mezbûr müdde‘âsını mübeyyine beyyine taleb olundukda ityân-ı beyyineden izhâr-ı acz ve istihlâf eyledikde maktûl-i mezbûru vech-i muharrer üzere hançer ile urup katl eylemediğine ve mûcibi üzerine vâcib olmadığına mezbûr Halil Bey’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcibiyle müdde‘î-i mezbûr ityân-ı beyyine etmedikçe bî-vech mu‘ârazadan men‘ olunup mâ-vaka‘a bi’t-taleb ketb olundu. Fî selhi Zilhicceti’ş-şerîfe sene 1067. Şühûdü’l-hâl: El-hâc İbrahim Çavuş b. İvaz el-mübâşir, el-Hâc Halil Çavuş b. Ali el-mübâşir, Ali Bey b. Sinan el-cündi, Fazlullah Efendi b. Mustafa.