Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 560 Hüküm no: 589 Orijinal metin no: [86b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Selim Beşe b. Süleyman’ın kardeşi Abdurrahman’ı öldürdüğü iddiasıyla Mehmed Bey aleyhine açtığı kısas davasında iddiasını ispat edemediği Ordu-yı hümâyûnda vâki‘ olmuşdur. Mahmiye-i İstanbul’da Tavukpazarı kurbünde Hüseyin Ağa mahallesinde sâkin iken bundan akdem mahmiye-i mezbûrede Bahçekapısı dâhilinde Tahtaminare mahallesinde mecrûhan maktûl bulunan Abdurrahman b. Mehmed’in li-ebeveyn karındaşı oğlu ve bi’l-inhisâr vârisi olan Selim Beşe b. Süleyman mahfil-i kazâda işbu bâ‘isü’l-kitâb Mehmed Bey b. ( ) mahzarında üzerine da‘vâ ve takrîr-i kelâm edip mezbûr Mehmed Bey târih-i kitâbdan on yedi gün mukaddem mûrisim mezbûr Abdurrahman’ı bi-gayri vechin hançer ta‘bîr olunur âlet-i câriha ile sol omuzundan urup katl eylemişdir mezbûrdan suâl olunup mûcib-i şer‘îsi icra olunmak murâdımdır dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ maktûl-i mezbûr Abdurrahman’ı vech-i muharrer üzere hançer ile urup katl eylemediğine ve mûcibi üzerine lâzım olmadığını mezbûr Mehmed Bey’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcibiyle müdde‘î-i mezbûr ityân-ı beyyine etmedikçe mu‘ârazadan men‘ olunup mâ-vaka‘a bi’t-taleb ketb olundu. Fî selhi Zilhicceti’ş-şer‘iyye sene 1067. Şühûdü’l-hâl: es-Sâbıkūn.