Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 560 Hüküm no: 590 Orijinal metin no: [87a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyh Mehmed b. Abdülmelik’in Şaban b. Mehmed’de altmış guruş alacağı olduğu Ordu-yı hümâyûnda vâki‘ olmuşdur. Mahmiye-i İstanbul’da Fenâyî Dede mahallesinde sâkin Şeyh Mehmed b. Abdülmelik nâm kimesne mahfil-i kazâda Şa‘ban b. Mehmed mahzarında üzerine takrîr-i da‘vâ edip mezbûr Şa‘ban zimmetinde cihet-i karz-ı şer‘îden doksan kıt‘a riyâlî guruş hakkım olup meblağ-ı mezbûrun on riyâlî guruşunu yedinden kabz edip ve yirmi riyâlî guruşunu Kasab Hüseyin b. Ali’den bana havâle-i sahîha-i şer‘iyye ile havâle edip zimmetinde altmış riyâlî guruş hakkım bâkī kalmışdır hatta mezbûr Şa‘ban târih-i kitâb şehrinin yirminci gününde mahmiye-i mezbûrede hilâfeten müvellâ olan umdetü’l-müderrisîni’l-kirâm Mevlânâ Abdulbâki huzûrunda bu vech üzere ikrâr etmekle mevlânâ-yı mezbûr ba‘de’t-tescîl yedime hüccet-i şer‘iyye vermişdir suâl olunup meblağ-ı bâkī-i mezbûr alıverilmesi matlûbumdur deyu mezbûr Şa‘ban’ın vech-i meşrûh üzere ikrârını mutazammın mevlânâ-yı mezbûrun imzâ ve hatemini müştemile hüccet-i şer‘iyye ibrâz edip mezbûr Şa‘ban muvâcehesinde kırâat ve istintâk olundukda cevâbında fi’l-hakīka mevlânâ-yı mezbûr huzûrunda meblağ-ı mezbûru vech-i meşrûh üzere ikrâr edip hüccet-i mesfûreyi alıvermişdim lâkin ikrâr-ı meşrûhumda kâzibim deyicek fi’l-vâki‘ mezbûr Şa‘ban ikrâr-ı mesfûrunda kâzib olmayıp ve kendi mezbûr Şa‘ban üzerine eylediği da‘vâsında mubtil olmadığına mezbûr Şeyh Mehmed’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Mustafa b. Osman, Ali Bey b. Şa‘ban, Ali b. Muharrem, Mehmed Çelebi b. ( ), Ramazan b. Ali ve gayruhüm mine’l-[hâzırîn.]