Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 561 Hüküm no: 591 Orijinal metin no: [87a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih b. Mehmed’in arakiye bedelinden Murad Bey b. Abdullah’ta on guruş alacağı olduğu Ordu-yı hümâyûnda vâki‘ olmuşdur. Mahmiye-i İstanbul’da Bezzâzistân-ı atîk kurbünde zenne arakıyyeci tâifesinden sâhibü hâze’l-kitâb Salih b. Mehmed nâm kimesne meclis-i şer‘-i hatîr-i lâzimü’t-tevkīrde Dergâh-ı âlî kapıcılarından olan Murad Bey b. Abdullah nâm bevvâb-ı sultanî mahzarında üzerine takrîr-i da‘vâ edip merkūm Murad Bey zimmetinde yedimden ve malımdan iştirâ ve kabz eylediği zenne arakıyye semeninden on kıt‘a riyâlî guruş hakkım vardır suâl olunup alıverilmesini taleb ederim dedikde gıbbe’s-suâl mezbûr Murad Bey cevâbında fi’l-hakīka müdde‘î-i mezbûra yedinden ve mülkünden iştirâ ve kabz ettiğim zenne arakıyye semeninden üzerime edâsı lâzım ve kazâsı vâcib on riyâlî guruş deynim vardır deyu müdde‘î-i mezbûr Sâlih’e on riyâlî guruş deyni olduğuna tav‘an ikrâr edicek i‘tirâfı mûcebince meblağ-ı mezbûru müdde‘î-i merkūma edâya Murad Bey üzerine ilzâm olunup mâ-vaka‘a [bi’t-taleb] ketb olundu. Fi’l-yevmi’l-sâlis mine’l-Muharremi’l-harâm li-sene semân ve sittîn ve elf. Şühûdü’l-hâl: Kenan Bey b. Abdullah, es-Seyyid Mehmed Çelebi kâtib-i ahkâm, Ali Beşe b. ( ) çukadâr, İbrahim b. Ömer ve gayruhüm.