Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 562 Hüküm no: 592 Orijinal metin no: [87a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhem bt. Şahmir’in kocası Hoce Bali ile oğulları Yadon ve Agop’un terekeleriyle ilgili olarak kızı Nazar ile yedi yüz guruşa sulh olup zimmetini ibra ettiği Mahmiye-i İstanbul’da Şeyh Ferhad mahallesinde sâkin olup bundan akdem hâlik olan Hoce Bali nâm Ermeni’nin verâseti zevcesi Meryem bt. Şahmir nâm Ermeniye’ye ve sulbî oğulları Agop ve Yadon’a ve sulbiye kebîre kızı Nazar’a münhasıra olup kable’l-kısme merkūm Agop dahi hâlik olup verâseti anası merkūme Meryem ve li-ebeveyn er karındaşı mezbûr Yadon ile li-ebeveyn kız karındaşı merkūme Nazar’a münhasıra olup kable’l-kısme merkūm Yadon dahi hâlik olup verâseti ancak anası merkūme Meryem ile kız karındaşı merkūme Nazar’a münhasıra olduğu ve tereke-i hâlik-i mezbûr bi-hükmi’l-münâsahati’l-mezbûre bin sekiz yüz sehimden i‘tibâr olunup sihâm-ı mezkûreden yedi yüz yirmi iki sehmi merkūm Meryem’e ve bin yetmiş sekiz sehmi merkūme Nazar’a isâbet ettiği şer‘an mütehakkık oldukdan sonra husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ Mehmed Efendi b. Veli Efendi irsâl olunup ol dahi mahmiye-i mezbûrede merkūm Şeyh Ferhad mahallesi kurbünde Kızıltaş mahallesinde sâkin Mehmed Çelebi b. Veli’nin menziline varıp zeyl-i kitâbda mastûru’l-esâmi olan udûl-i Müslimîn huzûrunda akd-i meclis-i şer‘-i hatîr etdikde hâlik-i mezbûrun zevcesi merkūme Meryem meclis-i ma‘kūd-ı mezbûrda hâlik-i mezbûrun kızı merkūme Nazar mahzarında tav‘an ikrâr ve i‘tirâf edip bi-hükmi’l-münâsahati’l-mezbûre zevcim merkūm Hoca Bali ile oğullarım hâlikân-ı mezbûrânın terekelerinden bana isâbet eden yedi yüz yirmi iki sehm hissemi merkūme Nazar ile şerâit-i sulhu hâvî şürût-ı müfsideden ârî sulh-ı tehârüc-i şer‘î ile yedi yüz riyâlî guruş üzerine sulh olup bedel-i sulh-ı mezbûru bir def‘a beş yüz seksen riyâlî guruş ve bir def‘a yüz yirmi riyâlî guruş cem‘an yedi yüz riyâlî guruşu meclis-i sulhda merkūme Nazar yedinden tamâmen ahz u kabz edip zevcim mezbûr Hoca Bali ile oğullarım mezbûrân Agop ve Yadon terekelerinden bi-hükmi’l-münâsahati’l-mezbûre bana isâbet eden yedi yüz yirmi iki sehm hissem da‘vâsından beri olup ve merkūme Nazar’ın zimmetini hâlikûn-ı mezbûrûnun terekelerinden hisse-i şer‘iyyem da‘vâsından ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d merkūme Nazar üzerine zevcim merkūm Hoce Bali’nin terekesinden olup mezkûr Şeyh Ferhad mahallesinde vâki‘ hudûdu beynimizde ma‘lûm olup merkūme Nazar ile ma‘an bey‘ eylediğimiz menzilin semenine müte‘allik ve yine mahalle-i mezbûrede vâki‘ olup merkūme Nazar ile ma‘an iştirâ edip hâlâ sâkine olduğumuz cemî‘ menzil merkūme Nazar’ın mülk-i mahzı ve hakk-ı sırfıdır dedikde gıbbe’t-tasdîkı’ş-şer‘î vâki‘-i hâli mevlânâ-yı mezbûr mahallinde tahrîr ve ba‘dehû [meclis-i] şer‘a gelip haber vermeğin mâ-vaka‘a bi’t-taleb ketb olundu. Fi’l-yevmi’l-ışrîn min-Zilhicceti’ş-şerîfe li-sene seb‘a ve sittîn ve elf. Şühûdü’l-hâl: Abdünnebi Efendi b. Durak el-imâm, Durmuş Halîfe b. Satılmış el-müezzin, Mehmed b. Satılmış, Feridun b. Abdullah, Ahmed Beşe b. Abdullah ve gayruhüm.