Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 563 Hüküm no: 593 Orijinal metin no: [87a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocabaşı İsak v. Köre’nin atına asa ile vurup sakat eden Kurd v. Mosko ve Hıristo v. Periho ile bin beş yüz akçe üzerine sulh olduğu Sirem koca[ba]şlarından Mitrofça kazâsına tâbi‘ Vika nâm karye sükkânından İsak v. Köre nâm zimmî meclis-i şer‘-i hatîr-i lâzimü’t-tevkīrde hâlâ mi‘mârbaşı olan mefharü’l-emâcid ve’l-ekârim Mustafa Ağa b. Abdülmennan’ın Eyüb kazâsına tâbi‘ Küçükçekmece nâhiyesinde Vidos nâm karyede vâki‘ çiftliği huddâmından olup husûs-ı âti’l-beyânda kendi tarafından asîl olup yine çiftlik-i mezbûr huddâmından olan Hıristo v. Periho nâm zimmî tarafından vekîl-i sâbitü’l-vekâle olan Kurd v. Mosko nâm zimmî mahzarında tav‘an ikrâr ve i‘tirâf edip dünkü gün mülk koçı bârgirlerimi ra‘y ederken mezbûr Kurd ve müvekkili mezkûr Hıristo ma‘an bârgirlerimden üç bin akçe kıymetli bir kır koçı bârgirimin lahana bostanımıza girdi deyu toyaka ta‘bîr olunur asâ-yı kebîr ile ön ayağının sağına bi-gayrı hakkın darb ve kesr etmeleriyle mezbûr bârgirin kıymet-i meşrûhasını merkūmândan taleb ve da‘vâ ettiğimde mezbûrân inkâr etmekle beynimizde münâza‘ât-ı kesîre vâkı‘a olmuşidi el-hâletü hâzihî beynimize müslihûn tavassut edip mezbûrân Kurd ve Hıristo ile beni bârgir-i [87b] meşrûhumun kıymet-i mezkûresi da‘vâsından an-inkâr bin beş yüz râyic [fi’l]-vakt akçe üzerine sulh eylediklerinde ben dahi sulh-ı mezbûru kabûl ve bârgir-i mezkûru merkūmân Kurd ve Hıristo red ile bedel-i sulh-ı mezbûru merkūmân yedlerinden tamâmen ahz u kabz edip mezbûrânın zimmetlerini husûs-ı mezkûra müte‘allik âmme-i de‘âvâdan ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d merkūmân Kurd ve Hıristo üzerlerine husûs-ı mezbûra müte‘allik bi-vechin mine’l-vücûh ve sebebin mine’l-esbâb da‘vâ ve hakkım yokdur dedikde gıbbe’t-tasdîk mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ mine’l-Muharremi’l-harâm li-sene semân ve sittîn ve efl. Şühûdü’l-hâl: Derviş Bey b. Abdullah, İbrahim Bey b. Ömer, Salih Beşe tâbi‘-i şer‘iyyâtî, Çukadâr Ali Beşe, Ramazan Beşe tâbi‘-i çukadâr ve gayruhüm mine’l-[hâzırîn.]