Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 565 Hüküm no: 595 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kefe avarızını toplamakla görevli İsmail Beşe b. Mustafa’nın Kefe Kadısı Mehmed Efendi b. Mustafa’da olan alacağını tahsil edip zimmetini ibra ettiği Dergâh-ı âlî dâme mahfûfen bi’l-me‘âlî yeniçerilerine mahsûs odalardan on üçüncü sekbânlar odasından olup medîne-i Kefe’nin bin altmış sekiz senesine mahsûb olmak üzere avârızını cem‘a me’mûr olan işbu bâ‘isü’l-kitâb İsmail Beşe b. Mehmed nâm râcil meclis-i şer‘de sâbıkā Kefe kādısı olan fahrü’l-kuzât Mehmed Efendi b. Mustafa mahzarında üzerine da‘vâ ve takrîr-i kelâm edip mezbûr Mehmed Efendi medîne-i mezbûrede kādı iken medîne-i mezbûre avârızını cem‘ etdirmek için benden bi-gayri vech-i şer‘î kırk üç kıt‘a riyâlî guruş ahz u kabz etmişdi suâl olunup alıverilmesi murâdımdır dedikde gıbbe’s-suâl mezbûr Mehmed Efendi cevâbında fi’l-hakīka müdde‘î-i mezbûrdan vech-i muharrer üzere kırk üç kıt‘a riyâlî guruş ahz u kabz etmişidim deyu ikrâr ve i‘tirâf etmeğin mûcebince meblağ-ı mezbûr kırk üç riyâlî guruşu müdde‘î-i mezbûra edâ ve teslîme merkūm Mehmed Efendi’ye tenbîh olundukdan sonra müdde‘î-i merkūm İsmail Beşe mahfil-i kazâda mukırr-ı merkūm Mehmed Efendi muvâcehesinde ikrâr edip ânifen edâsına tenbîh olunan meblağ-ı mezbûr kırk üç kıt‘a riyâlî guruşu mukırr-ı merkūm Mehmed Efendi yedinden tamâmen ahz u kabz eyledim min ba‘d meblağ-ı mezbûrdan merkūm Mehmed Efendi zimmetinde bir akçe ve bir habbe hakkım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ mine’l-Muharemi’l-harâm li-sene semân ve sittîn ve elf. Şühûdü’l-hâl: Fahrü’l-a‘yân İvaz Ağa b. Hüseyin muhzırbaşı, İsa Bey b. Ahmed el-muhzır, Mehmed beşe b. Mehmed er-râcil, İbrahim Beşe b. Ömer, Ramazan Efendi b. İbrahim el-kādî, Ahmed Çelebi b. ( ) el-muhzır.