Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 566 Hüküm no: 596 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gazi Davud Paşa Vakfı’na ait Sıçanlı Hamamı’nın mütevellisi tarafından 82.969 akçe harcanarak tamir edildiği İşbu kitâbın sudûrunda tevkī‘-i müstetâbı ile tahalliye eden hâkim-i vâlâ-cenâb tûbâ lehü ve hüsnü-meâb hazretlerinin taht-ı nezâretlerinde olan mahmiye-i İstanbul’da merhûm Gazi Davud Paşa Vakfı’na bi’l-fi‘il mütevellî olan işbu râfi‘ü’l-kitâb Hâcı Mehmed Ağa b. Mustafa meclis-i şer‘-i hatîrde bi’t-tevliye takrîr-i kelâm edip mütevellîsi olduğum Davud Paşa Vakfı’nın müstegallâtından olup mahmiye-i mezbûrede Ha[lı]cılar Köşkü nâm mevzi‘ kurbünde Sıçanlı Hamam demekle ma‘rûf çifte hamamın külhanına ve kazgan ve kubbe ve kaygane döşemesinin bazı mevâzi‘i mürûr-ı eyyâm ile eskiyip bazısını tecdîd ve bazısını meremmât lâzım gelmeğin bi’l-izni’ş-şer‘î yedimde olan mâl-ı vakıfla imâret ve meremmet eylemişimdir üzerine varılıp masrûfumun mertebe-i tahammülü tahmîn ve takvîm olunmak bi’t-tevliye matlûbumdur dedikde cânib-i şerî‘at-ı mergūbeden Mevlana Mustafa Efendi irsâl olunup ol dahi hâssa mi‘mârlardan el-Hâc Hasan b. Ömer ve zeyl-i sahîfede isimleri mastûr olan bî-garaz Müslimîn ile zikrolunan hamama varıp vakf-ı mezbûrun berât-ı pâdişâhî ile nâzırı olan Salih Efendi b. Ebîbekir muvâcehesinde nazar eylediklerinde fi’l-vâki‘ vech-i muharrer üzere imâret ve meremmeti mukarrer oldukdan sonra mi‘mâr-ı mezkûr el-Hâc Hasan nâzır-ı mezbûr Salih Efendi muvâcehesinde mesâha ve takvîm eyledikde hammâm-ı mezbûrun üç yüz elli vakıyye köhne ve delik kazganı dört yüz seksen beş vakıyye cedîd kazgana tebdîl için yirmi altı bin yüz elli akçe ve hammâliyye bin yüz elli beş akçe ve külhan için battâl on altı kürsü taşı yüzer akçeden bin altı yüz akçe ve üç kalıb battâl kürsü taşı yüz yirmişer akçeden altı yüz altmış akçe ve bir taş taban iki yüz elli akçe ve dört pehlü taşı yüz yirmişer akçeden dört yüz seksen akçe ve dört kademe taşı ellişer akçeden iki yüz akçe ve üstâdiye bin dört yüz akçe ve vakıyyesi beşer akçeden dört yüz altmış vakıyye lökün iki bin üç yüz akçe ve vakıyyesi yirmişer akçeden iki yüz yirmi vakıyye bezîr yağı dört bin iki yüz akçe ve dört cedîd cehennemlik ayağı yüzer akçeden dört yüz akçe ve üstâdiyye iki bin beş yüz akçe ve vakıyyesi otuz akçeden otuz beş vakıyye eczâ-i hammâm bin yetmiş bir akçe ve tahliye-i cehennem ve kapı bin iki yüz akçe ve badana bin üç yüz akçe ve kayağan üstâdiyyesi ve hammâliyye iki bin dokuz yüz yetmiş beş akçe ve yirmi yedi zirâ‘ meremmât beş yüz kırk akçe ve tûlen ve arzan be-hesâb-ı terbî‘î kerevit döşemesi ve zirâ‘ı yirmi beşer akçeden yirmi bir zirâ‘ beş yüz yirmi beş akçe ve yirmi dokuz zirâ‘ sofa döşemeleri zirâ‘ı yirmişer akçeden beş yüz seksen akçe ve on iki tahta on akçeden yüz yirmi akçe ve nisvâna mahsûs olan hamamda yirmi iki trabzon kırkar akçeden sekiz yüz seksen akçe ve kırk tahta onar akçeden dört yüz akçe ve altı trabzon ellişer akçeden üç yüz akçe ve iki kebîr trabzon yüzer akçeden iki yüz akçe ve on iki trabzon ellişer akçeden altı yüz akçe ve bir trabzon otuz akçe ve altı sırık kırk sekiz akçe ve kubbe kalemli ma‘a koltuk sıvası yüz zirâ‘, zirâ‘ı on akçeden on iki bin akçe [bin akçe] ve hazîne döşemesi üç bin dokuz yüz akçe ve çifte hamamın terzi ve sıvası beş bin beş yüz yetmiş akçe ve duvarı ve seddinin meremmâtı dört yüz yirmi akçe ve külhan ocağı için bin akçe ve dört cam dört yüz akçe ve iki yüz yetmiş üç kubbe camı beşer akçeden bin üç yüz altmış beş akçe ve bin üç yüz tuğla bin beş yüz akçe ve hazîne meremmâtı için yirmi beş köhne peştamal iki yüz elli akçe ve yama için beş yüz akçe ve battâliyye bin akçe ve hamam döşemesi için otuz üç bin akçe ki cem‘an seksen iki bin dokuz yüz altmış dokuz akçe ile ancak imâret ve meremmet olunur bundan ekal ve noksân ile mümkün değildir deyu tahmîn eylediklerini mevlânâ-yı mezbûr mahallinde ba‘de’t-tahrîr ma‘an ba‘s olunan Ahmed Çelebi ve Mehmed Çelebi meclis-i şer‘a gelip vukū‘u üzere inhâ ve tahrîr etmeğin mâ-vaka‘a [bi’t-taleb ketb olundu.] Fî 27 min Ramazan sene 1067. Şühûdü’l-hâl: Mahmud Efendi b. Hasan el-imâm, Mahmud Efendi b. Şa‘ban el-imâm, Hasan Beşe b. Osman el-mimar, Mustafa b. Süleyman, Abdulbâki b. Ahmed, Hâcı Yusuf b. ( ) el-hammâmî, Hâcı Sefer b. ( ), Hüseyin Halîfe b. ( ) el-müezzin, Mahmud Efendi kâtib-i vakf, Mustafa b. Mehmed el-câbî, Hâcı Ebûbekir b. ( ), Yahya b. Osman, Mehmed Çelebi b. İsmail.