Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 567 Hüküm no: 597 Orijinal metin no: [88a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haseki Sultan Vakfı’na ait çifte hamamın kiracısı Hadice Hatun ve çocukları Mehmed ve Fatma tarafından tüm hamam eşyası ve odunlarının Çinili Hamam’ın hamamcısı Ömer Ağa’ya satıldığı Mahmiye-i İstanbul’da Molla Fenarî mahallesi sükkânından olup mahmiye-i mezbûrede Ayasofya-i kebîr sükûnda vâki‘ merhûm Haseki Sultan Vakfı olan çifte hamamın hamamcısı iken bundan akdem vefât eden el-Hâc Ebîbekir Bey b. Abdülmennan’ın verâseti zevce-i menkûhası Hadice bt. Mustafa Ağa nâm hâtuna ve sulbî sagīr oğlu Mehmed ile sulbiye sagīre kızları Âişe ve Fâtıma’ya münhasıra olup kable’l-kısme merkūme Âişe dahi fevt olup verâseti vâlidesi merkūme Hadice Hâtun’a ve li-ebeveyn karındaşları sagīran-ı mezbûrâna münhasıra olduğu ve tereke-i müteveffâ-yı mezbûr bi-hükmi’l-münâsahati’l-mezkûr beş yüz yetmiş altı sehimden i‘tibâr olunup sihâm-ı mezbûreden doksan üç sehmi zevcesi merkūmeye ve üç yüz yirmi iki sehmi oğlu mezbûr Mehmed’e ve yüz altmış bir sehmi kızı merkūme Fâtıma’ya isâbet eylediği şer‘an mütehakkık oldukdan sonra husûs-ı âti’l-beyânı bi’l-iltimâs mahallinde tahrîre savb-ı şer‘den irsâl olunan mevlânâ Mehmed Efendi b. Veli Efendi mârrü’z-zikr hamama varıp zeyl-i kitâbda mastûru’l-esâmi olan udûl-i Müslimîn ve sikāt-ı muvahhidîn huzûrunda akd-i meclis-i şer‘-i hatîr etdikde müteveffâ-yı mezbûrun li-ebeveyn karındaşı ve sagīran-ı mezbûrânın vasiyy-i muhtârları olan Hüseyin Bey b. Abdülmennan vesâyeten ve merkūme Hadice’nin babası ve husûs-ı âti’l-beyâna tarafından vekîl-i müsecceli olduğundan mâ‘adâ vasiyy-i mezbûr Hüseyin Bey vesâyet-i mezbûrede adl ve kâfi olmamağla savb-ı şer‘den mezbûr Hüseyin Bey’in vesâyetine zam olunan mezkûr Mustafa Ağa vekâleten ve vesâyeten meclis-i ma‘kūd-ı mezbûrda hâlâ mahmiye-i mezbûrede Çinili Hamamı’ın hamamcısı olan sâhibü hâze’l-kitâb Ömer Ağa b. ( ) mahzarında herbiri tav‘an ikrâr ve i‘tirâf edip müteveffâ-yı mezbûr el-Hâc Ebîbekir vefât etdikde hammâm-ı mezbûr taht-ı icâresinde bulunmağla tecdîd-i akd-i icâre-i hammâm-ı mezbûr sıgāra enfa‘ olmak üzere hammâm-ı mezkûru re’y-i hâkimü’ş-şer‘le mütevellî-i vakf-ı mezbûrdan zevcesi merkūme Hadice ile sıgār-ı mezbûrûn için istîcâr ve içinde mevcûd olan odun ve sâir esvâbı mahmiye-i mezbûrede vâki‘ olan hamamların hamamcıları beyninde cârî olan âdet-i kadîmeleri üzere ma‘rifet-i hâkimü’ş-şer‘le yedi bin beş yüz riyâlî guruşa takvîm ve tahmîn-i sahîh ile tahmîn olunup on yedi ay merkūme Hadice Hâtun ile sıgār-ı mezbûrûn taraflarından zabt olunmağla şühûr-ı mezkûrede hammâm-ı mezbûrun masrafı ve hâsıl olan mahsûlü hesâb ve tatbîk olundukda ba‘de ihrâci’l-masârıf sıgār-ı mezbûrûna şey-i kalîl hâsıl olduğu şer‘an müte‘ayyin olduğundan mâ‘adâ sıgār için hamam istîcârına şer‘an mesâğ olmayıp belki zarar-ı azîm olup hamamcı tâifesinin âdet-i kadîmeleri üzere hâlâ mevcûd olan odunu ve sâir esvâbı bey‘ olunup hâsıl olan semeni istirbâh ve istiğlâl olunmasında sıgāra nef‘-i küllî olduğu mütebeyyin olmağın müvekkile-i merkūme Hadice Hâtun ile sagīran-ı mezbûrânın malları ile iştirâ ve hammâm-ı mezbûrun külhanı havlusuna vaz‘ olunan yedi buçuk istif odunu ile cinsi vukū‘u beynimizde ilm-i şer‘î ile ma‘lûm olan peştamal ve havlu ve sâir [88b] levâzımı ma‘rifet-i şer‘le bey‘a arz olunup müddet-i medîde beyne’t-tâlibîn müzâyede olunup bi’l-âhare yedi bin dokuz yüz yirmi beş riyâlî guruşda merkūm Ömer Ağa üzerinde karâr edip ziyâde ile tâlib-i âhar olmadığı ecilden biz dahi vesâyet ve vekâletimiz hasebiyle hammâm-ı mezbûrun cemî‘ mevcûd odununu ve hâlâ mevcûd olup ma‘lûmumuz olan peştamal ve havlu ve silecek ve makrame ve sâir levazımını kâffe-i hukūkuyla yedi bin dokuz yüz yirmi beş riyâlî guruşa tarafeynden îcâb ve kabûlü hâvî bey‘-i bâtt-ı sahîh ile safka-i vâhide ile merkūm Ömer Ağa’ya bey‘ ve teslîm edip ol dahi nefsi’çün iştirâ ve kabûl ve tesellüm ettikden sonra semen-i merkūm yedi bin dokuz yüz yirmi beş riyâlî guruşu târih-i kitâbdan yüz seksen gün tamâmına değin te’cîl eyledik dediklerinde mukırrân-ı mezbûrânı vech-i muharrer üzere cârî ve sâdır olan ikrârlarında el-mukarru lehü’l-mezbûr Ömer Ağa dahi bi’l-müvâcehe ve bi’l-müşâfehe tahkīk ve tasdîk ettikden sonra mahmiye-i mezbûrede Nişancı Paşa Hamamcısı Ömer Ağa b. Mehmed ve Sinan Hamamcısı Ahmed Çelebi b. Mehmed ve Çukur Hamamcısı el-Hâc Hüseyin b. Abdullah ve Hamamcılar Kethüdâsı Ahmed Ağa b. Abdülmennan ve Aksaray Hamamcısı Hasan Çelebi b. Hamza, ( ) Hamamcısı Halil Ağa b. Mustafa ve Kurubalık Hamamcısı Ahmed Bey b. Abdullah ve Pertav Paşa Hamamcısı Memiş Çelebi b. Mustafa ve İbrahim Paşa Hamamcısı Osman Bey b. Abdülmennan ve Ağa Hamamcısı Şa‘ban Çelebi b. Receb ve Karaköy Hamamcısı Mehmed Çelebi b. Hasan ve Haseki Hamamcısı Mustafa Çelebi b. Mehmed’den herbiri semen-i merkūm yedi bin dokuz yüz yirmi beş riyâlî guruşa tarafeynden emr ve kabûlü hâviye kefâlet-i sahîha-i şer‘iyye ile kefîl olduklarında vâki‘ hâli mevlânâ-yı mezbûr mahallinde tahrîr ve ba‘dehû meclis-i şer‘a gelip vukū‘u üzere ihbâr ve takrîr edicek mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Zülfikar Çavuş b. Hasan, el-Hâc Ali b. Abdullah, Mustafa Çelebi b. Mehmed, Fethullah b. Ahmed, el-Hâc Ebîbekir b. Abdullah, el-Hâc Osman b. Abdullah, Karakaş Mustafa Çelebi b. Mahmud, Hasan Beşe b. Ali, el-Hâc Mehmed b. Hüseyin, Saçlı el-Hâc İbrahim, Mehmed Çelebi b. Satılmış, Mustafa b. Abdullah, Kadri Beşe çukadâr ve gayruhüm.